Aýǵanstannyń ekonomıkasy quldyrap, ashtyq bolyp jatyr - BAQ

NUR-SULTAN. QazAqparat - VVS telejúrgizýshisi ıAlda Hakım Aýǵanstanda týǵan. Onyń otbasy 80-jyldary basqa elge kóship ketken, biraq keıin ol Aýǵanstanǵa jýrnalıst retinde birneshe ret kelgen. Ol el bıligin tálipter (Qazaqstanda tyıym salynǵan uıym - QazAqparat) óz qolyna alǵannan keıin alǵash ret otanyna kelip tur, dep habarlaıdy QazAqparat VVS agentigine silteme jasap.

«Aýǵanstanda densaýlyq saqtaý júıesiniń qyzmetkerleri – Kandagardaǵy dárigerlerden Kabýldaǵy aýrýhananyń eden jýýshylaryna deıin buǵan deıingi úkimet qulaǵannan keıin jáne sheteldik kómek toqtaǵannan keıin jalaqy almaǵan. Olar ózderi de asharshylyq aldynda tur, biraq soǵan qaramastan jumysqa baryp, adamdarǵa kómektesip jatyr», - deıdi jýrnalıst.
Nasrın Aýǵanstan astanasy Kabýldegi Indıra Gandı atyndaǵy aýrýhanada eden jýýshy bolyp jumys isteıdi.
«Eger biz jumysqa shyqpasaq, bul balalar ólip qalady. Biz olardy qalaı tastap ketemiz?», - dedi ol.
Kishkentaı patsıentterdiń basym bóligi tamaq toıyp ishpegendikten óte álsiz. Palatalar ınfektsııa juqtyryp almaýy úshin taza bolýy tıis.
Nasrınniń aıtýynsha, onyń kólikke minetin aqshasy joq. Ol jumysqa jaıaý keledi. 12 saǵattyq aýysymnan keıin taý jotasymen tómen túsip, keıin qaıta taýǵa shyǵady.
BUU baǵalaýy boıynsha, 23 mıllıon aýǵandyq ashtyqtan kóz jumýy múmkin. Turǵyndardyń 95%-y toıyp tamaq ishpeıdi.
«Talıbannyń» resmı ókili Sýheıl Shahın bárine halyqaralyq qoǵamdastyqty kinálap otyr. Onyń aıtýynsha, aýǵan halqy Batystyń kesirinen japa shegip otyr.
«Olar eldiń quldyrap jatqanyn, asharshylyq aldynda turǵanyn aıtýda – bul qaıǵyly jaǵdaıdyń aldyn alý úshin birdeńe istesin. Adam quqyǵy týraly aıtyp júrgen elder, halyqaralyq qoǵamdastyqtar Aýǵanstandy gýmanıtarlyq krızıske ákeletin áreketterin toqtatsyn», - deıdi Shahın.