Aýǵanstan tarabynan bosqyndar leginiń artýy kútilmeıdi - QR SІM

ASTANA. QazAqparat - Aýǵanstan tarabynan Qazaqstanǵa qaraı bosqyndar leginiń artýy kútilip otyrǵan joq. Bul týraly búgin QR Syrtqy ister mınıstrliginiń aıryqsha tapsyrmalar jónindegi ókili Tımýr Orazaev málim etti.

«Aýǵanstannan bosqyndardyń kóshi-qony ár ýaqytta da bolǵan. Sonaý 90-shy jyldary da, 2000-shy jyldary da jáne bolashaqta da bosqyndar bola beredi. Jalpy, kóshi-qon - bul turaqty qubylys. Turaqsyzdyq aımaǵynan bas saýǵalaýǵa tyrysatyn bosqyndarǵa qatysty aıtar bolsam, Aýǵnastanda qaýipsizdikti qamtamasyz etý problemalary barynsha sheshilý ústinde. Degenmen, áli kúnge deıin tolyǵymen jetildirilgen joq. Sondyqtan da bosqyndar legin kútýge týra keledi», - dedi ol.

T.Orazaevtyń sózine qaraǵanda, osy jyldar ishinde Qazaqstanǵa bas saýǵalap kelgen bosqyndardyń sany kóp bola qoıǵan joq. Óıtkeni, elimizde shekaralyq jáne kedendik rejim jumys isteıdi. Al, bosqyndardyń basym bóligi Aýǵanstanmen shekaralas Pákistan men Iran elderin panalaıdy. Sonymen qatar Úndistan, Tájikstan, Ózbekstan jáne basqa da memleketterge qonys aýdaratyn aýǵandyqtar da bar.

«Bul turǵydan alyp qaraǵanda, Qazaqstanda jaǵdaı jaqsy. 2014 jyldan keıin elimizge keletin bosqyndar legi aıtarlyqtaı kóbeıedi dep oılamaımyn», - dedi aıryqsha tapsyrmalar jónindegi ókil.