Aýǵanstan qyzdary Eýroodaq esebinen elimizdiń JOO-larynda oqıdy

ASTANA. QazAqparat - Qazaqstan Eýropalyq Odaq - Ortalyq Azııa formatynda syndarly jáne senimdi dıalogty damytýǵa úlken mán beredi. Bul týraly Syrtqy ister mınıstriniń mindetin atqarýshysy Beıbit Atamqulov EO-nyń Ortalyq Azııa boıynsha Arnaıy ókili Peter Býrıanmen kezdesýinde aıtty, dep habarlaıdy QazAqparat.

B.Atamqulov atap ótkendeı, búgingi kúni EO Ortalyq Azııa elderiniń gúldenýi men birligine múddeli jáne uıym elimizdiń senimdi seriktesi bolyp tabylady.

«EO Arnaıy ókiliniń Qazaqstanǵa sapary Eýroodaqtyń Ortalyq Azııa boıynsha jańa Strategııasynyń qabyldanýy qarsańynda qujattyń basym baǵyttaryn óńir elderimen aqyldasý maqsatynda ótýde. Sońǵy eki jyl boıy Qazaqstan aımaqtaǵy kórshiles eldermen birge qujatty daıyndaý sheńberinde sapaly ári mazmundy ıdeıalar men usynystar joldaǵan bolatyn.

P. Býrıan qazaqstandyq tarapqa jańa Strategııanyń mazmunyna qatysty konstrýktıvti usynystary úshin alǵysyn bildirdi jáne onyń tıimdi iske asyrylýy barlyq múddeli taraptarǵa tıesili ekendigin atap aıtty», - delingen QR SІM-niń baspasóz habarlamasynda.

Kezdesý barysynda adamı kapıtaldy damytý, quqyq ústemdigin jáne sapaly memlekettik basqarýdy qamtamasyz etý, shaǵyn jáne orta bıznesti damytý, jalpy tsıfrlandyrý, kóliktik-logıstıkalyq ınfraqurylymdy damytý, energııa tıimdiligin arttyrý, jasyl tehnologııalar, qorshaǵan ortany qorǵaý, sý resýrstaryn tıimdi paıdalaný jáne qaýipsizdik sııaqty baǵyttardyń jańa Strategııada qamtylý mańyzdylyǵy atap ótildi.

Yntymaqtastyqtyń perspektıvalyq baǵyttarynyń biri retinde aǵymdaǵy jyly EO qarajaty esebinen Qazaqstannyń joǵary oqý oryndarynda Aýǵanstan qyzdaryn oqytýdyń birlesken baǵdarlamasyn iske qosylýy atap ótildi. Taraptar bilim berý jobasynyń Aýǵanstandaǵy áıelder men balalardyń jaǵdaıyn jaqsartýǵa, sondaı-aq jalpy osy eldegi jaǵdaıdy retteýge yqpal etetinine kelisti.

Aımaqtyq yntymaqtastyq máselelerin talqylaı kele, taraptar Ortalyq Azııadaǵy sońǵy jyldary joǵary dınamıkamen erekshelenip kele jatqan saıası jáne ekonomıkalyq protsesterdi atap ótti. Bul óz kezeginde ózara tıimdi seriktestiktiń barlyq spektri boıynsha jańa perspektıvalar ashatyn bolady.

QR-EO ekijaqty yntymaqtastyq máselelerin talqylaý aıasynda, Arnaıy ókil P. Býrıan Qazaqstannyń saýda-ekonomıkalyq yntymaqtastyqty tereńdetý, qazaqstandyq eksportty ulǵaıtý, ekonomıkanyń basym sektorlaryna eýropalyq ınvestıtsııalardy tartý, bizdiń azamattarymyz úshin EO vızalyq rejımin jeńildetý maqsatynda dıalogty damytý nıeti týraly habardar etti.

Taraptar Qazaqstan Respýblıkasy men Eýropalyq Odaq arasyndaǵy Keńeıtilgen áriptestik jáne yntymaqtastyq týraly Kelisimniń (KÁYK) kúshine ený perspektıvalaryn talqylady jáne onyń ózara múddeli kóptegen salalarda ekijaqty yntymaqtastyqqa jańa múmkindikter ashady.

2018 jyly taýar aınalymy 37,7 mlrd AQSh dollaryn qurady, 2018 jyldyń birinshi jartysynda Qazaqstannyń ekonomıkasyna tartylǵan tikeleı sheteldik ınvestıtsııalardyń jalpy kólemi 12,3 mlrd dollarǵa jetti. Búgingi tańda Qazaqstanda eýropalyq kompanııalardyń qatysýymen shamamen 3 mlrd AQSh dollary kóleminde 24 ınvestıtsııalyq joba júzege asyrylýda. EO Qazaqstannyń saýda seriktesteri arasynda bizdiń taýar aınalymynyń jalpy kóleminde shamamen 50% úlespen kóshbasshylyqty saqtap otyr. Osy kólemdi saqtap qana qoımaı, olardy ulǵaıtý baǵytynda jumys isteý qajettiligi atap ótildi.

Kezdesý sońynda taraptar aǵymdaǵy jyly óte mazmundy bolatyn EO-OA jelisi boıynsha aldaǵy is-sharalar kestesin talqylady.