Áýejaılar men ushaqtarda múmkindigi shekteýli jandarǵa laıyqty jaǵdaı jasalǵan ba
Basqosýda QR IIDM Azamattyq avıatsııa komıteti tóraǵasynyń orynbasary Saltanat Tompıeva áýe kóliginde múmkindigi shekteýli jolaýshylarǵa kedergisiz orta qalyptastyrýǵa baǵyttalǵan qoldanystaǵy zańnamany jetildirýge baılanysty atqarylyp jatqan jumystar týraly aıtty.
Bul jumystar sheńberinde Jolaýshylardy, bagajdy jáne júkterdi áýe kóligimen tasymaldaý qaǵıdasyna birqatar túzetýler engizildi. Atap aıtqanda, mentaldi aqaýy bar jolaýshylarǵa qolaıly jaǵdaı jasaý, múmkindigi shekteýli jolaýshylarǵa olardyń qajettiligine qaraı oryn bólý qarastyrylǵan.
Al Qazaqstannyń azamattyq avıatsııa ákimshiliginiń ókili elimizdegi áýejaılarda erekshe qajettiligi bar jolaýshylarǵa qyzmet kórsetý boıynsha tıisti talaptar saqtalatynyn atap ótti.
«Avıatsııa ákimshiligi tehnıkalyq qadaǵalaýdy turaqty iske asyrýda. Máselen, jyl basynan beri 7 arnaıy tekseris júrgizilip, onyń nátıjesinde 15 buzýshylyq anyqtaldy. Inspektsııa barysynda múmkindigi shekteýli jandarǵa arnalǵan ambýlatorlyq lıftiniń joqtyǵy jáne birqatar qyzmetterdiń qoljetimsizdigi belgili boldy. Barlyq eskertýlerdi áýejaılardyń ákimshiligi bekitilgen merzimde oryndaýda», – dedi Qazaqstannyń azamattyq avıatsııa ákimshiliginiń ókili.
Óz kezeginde múmkindigi shekteýli azamattardyń quqyǵyn qorǵaý boıynsha úkimettik emes uıymnyń ókili Vasılıı Shımanskıı áýe kóliginde erekshe qajettilikti talap etetin jolaýshylarǵa qolaıly jaǵdaı jasaýǵa baǵyttalǵan naqty sharalar engizý kerektigin alǵa tartyp, osy taraptaǵy usynystaryn jetkizdi.
Onyń qatarynda avıakompanııalardyń jolaýshylardyń suraǵy men ótinishine der kezinde jaýap berý, arbaǵa tańylǵan azamattardy tirkeý kezindegi protsesterdi jetildirý syndy usynystar bar. Sonymen qatar basqa eldiń aýmaǵyndaǵy jolaýshylarǵa reıstiń keshigýi nemese keıinge qaldyrylǵany jónindegi habarlamany ýaqtysynda habarlaý tetigin iske qosý da aıtyldy.
«Bunyń barlyǵy da keshendi másele ekendigi belgili. Sondyqtan da barlyq kategorııadaǵy azamattar úshin qolaıly jaǵdaılar jasalýy tıis. Áýejaılar túrli qajettiligi bar adamdarǵa beıim bolǵany jón. Ásirese, múmkindigi shekteýli azamattarǵa ózdiginen qyzmet kórsete alýyna erekshe nazar aýdarý kerek», – deıdi qoǵamdyq uıym ókili.
Sóziniń sońynda ol áýe kóliginde erekshe qajettiligi bar jolaýshylarǵa qyzmet kórsetý boıynsha tájirıbe almasýdy uıymdastyrýdyń mańyzyn atap ótip, osy oraıda arnaıy jumys tobyn qurýdy usyndy.
Azamattyq avıatsııa komıteti tóraǵasynyń orynbasary yntaly memlekettik organdar men ózge de uıym ókilderiniń qatysýymen jumys toby qurylǵanyn jetkizdi. Sondaı-aq Saltanat Tompıeva azamattar tarapynan ótinishterge jaýaptar zańǵa sáıkes naqty merzimde berilýi tıis ekendigin aıtty.
AUTISM KAZAKHSTAN Ulttyq Qaýymdastyǵynyń tóraǵasy Nurııa Baltabaıqyzy mentaldi aqaýy bar jolaýshylarǵa áýe kóliginde qolaıly jaǵdaı týǵyzyp, osy taraptaǵy qoldanystaǵy zańnamaǵa ózgerister engizýge bastamashylyq tanytqany úshin Azamattyq avıatsııa komıteti tóraǵasy Talǵat Lastaev bastaǵan jumys tobyna alǵysyn bildirdi. Sondaı-aq ol múmkindigi shekteýli balalarǵa da yńǵaıly jaǵdaı jasaý boıynsha birneshe is-sharany usyndy. Usynystar qatarynda mentaldi aqaýy bar jetkinshekterge áýejaılarda arnaıy taspalar berilý kerektigin aıtty. Bul áýejaı qyzmetkerlerine atalǵan jolaýshyǵa qyzmet kórsetýde erekshe nazar aýdarý kerektigin bildiredi.
Qoǵamdyq uıym jetekshisiniń aıtýynsha, aýtızm dertine shaldyqqan nemese ózge de mentaldi aqaýy bar balalardyń minez-qulqynda agressıvtilik basym bolady. Bul tirkeý kezinde nemese júkterdi tekserý barysynda qolaısyzdyq týyndatýy múmkin.
Basqosý barysynda ÚEU ókilderi keıbir ınternet-platformalar arqyly avıabıletterdi satyp alý barysynda áýe kompanııalardyń múmkindigi shekteýli jáne mentaldi aqaýy bar jolýshylarǵa qajetti jaǵdaılar týraly aqparattyń joqtyǵyna da nazar aýdardy. Qoldanystaǵy zańnamaǵa oraı jolaýshylar da avıakompanııalarǵa joǵarydaǵy shekteýler týraly aldyn ala habarlaýy tıis. Jıynda áýe kompanııalardyń ókilderine osy baǵyttaǵy sharalardy jetildirý júkteldi.
Jıyn qatysýshylary qozǵalysy shekteýli azamattar tobyna kedergisiz orta qurý basty maqsat ekendigin aıtty. Basqosý sońynda Azamattyq avıatsııa komıteti tóraǵasynyń orynbasary usynystardyń barlyǵy eskeriletindigin atap ótip, otandyq áýejaılar men avıakompanııa ókilderine jáne Qazaqstannyń avıatsııa ákimshiligine tıisti tapsyrmalar berildi.
Óz kezeginde avıakompanııa men áýejaı ókilderi basqosýda kóterilgen máselelerdiń barlyǵy nazarǵa alynatynyn, sondaı-aq áýe tasymaly kezinde múmkindigi shekteýli azamattarǵa qyzmet kórsetý sapasyn arttyrýdy jetildirý boıynsha jumystar jalǵasyn tabatyndyǵyn málimdedi.
Aıta keteıik, «Ashyq saǵat alańy» jobasy mınıstr Qaıyrbek Óskenbaevtyń bastamasymen túrli túıtkildi máselelerdi talqylaý, sondaı-aq IIDM-niń jan-jaqty qaralǵan jáne zerdelengen josparlary men sheshimderin qabyldaý úshin qurylǵan bolatyn. Joba «Halyq únine qulaq asatyn memleket» tujyrymdamasyn júzege asyrýǵa, vedomstvo qyzmetkerleriniń qoǵammen keri baılanys ornatýǵa jáne múddeli azamattardy ózekti jalpyulttyq mindetterdi talqylaýǵa tartý úshin baǵyttalǵan.
Jıynǵa Qazaqstannyń avıatsııa ákimshiligi, otandyq áýejaılar men avıakompanııalardyń ókilderi jáne múmkindigi shekteýli azamattardyń quqyǵyn qorǵaý jónindegi úkimettik emes uıymdardyń jetekshileri qatysty.
