Áýe arqyly júk tasymaldaıtyn iri kompanııa Qazaqstanǵa qatynaı bastady

ASTANA. QazAqparat - Júk áýe tasymaldarynyń álemdik naryǵynyń úzdigi Cargolux Astana áýejaıymen yntymaqtastyqty bastady, dep habarlaıdy QazAqparat Nursultan Nazarbaev halyqaralyq áýejaıynyń baspasóz qyzmetine silteme jasap.

Baspasóz qyzmetiniń málimetterine qaraǵanda, búgin Sargolux júk áýekompanııasy óziniń alǵashqy reısin oryndady.

Bolashaqta Lıýksembýrgten Qytaı, Japonııa jáne Taıvan qalalaryna aptasyna 10-nan astam reıs josparlanǵan.

Esterińizge sala keteıik, Astanada uzaq ýaqyt boıy turaqty júk reısteri bolmady, Sargolux áýe kompanııasy jańa múmkindikterdi qarastyryp, Eýropa men Qazaqstan jáne Ońtústik-Shyǵys Azııa elderi arasyndaǵy júk aǵynyn damytý úshin Astana qalasyn tańdady.

«Elordalyq áýejaıdyń geografııalyq ornalasýy óte jaqsy, sonymen qatar Qazaqstandaǵy eń úzdik ınfraqurylymy bar áýejaı bolyp esepteledi. Áýejaı 2020 jyly óz bıznesin ártaraptandyrdy, júk tranzıttik áýe kompanııalaryn tartýdyń eń jaqsy sharttaryn oılastyrdy, sondyqtan álemdegi eń tarıhı jáne eń tanymal tasymaldaýshylardyń birimen seriktes bola aldy. Qosh keldiń, Cargolux!»,-delingen habarlamada.