Aýdıtorlar endi memlekettik aýdıtor sertıfıkatyn eGov.kz arqyly ala alady

ASTANA. KAZINFORM — Memlekettik aýdıtor biliktiligin alý úshin ótinimdi endi eGov.kz portalynda onlaın bere alady. Bul týraly «Ulttyq aqparattyq tehnologııalar» AQ baspasóz qyzmeti málim etti.

Aýdıt salasyndaǵy mamandar endi memlekettik aýdıtor sertıfıkatyn alý úshin ótinimdi eGov.kz portaly arqyly onlaın tapsyra alady. Jańa servıs jeke tulǵalarǵa qoljetimdi jáne sertıfıkattaý úderisin aıtarlyqtaı jeńildetedi. Ol barlyq qajetti qujattardy onlaın tapsyrýǵa jáne ótinimniń mártebesin Jeke kabınetten qadaǵalaýǵa múmkindik beredi.

Memlekettik aýdıtor sertıfıkaty — bul mamannyń biliktiligin rastaıtyn qujat. Sertıfıkat ıesi Qazaqstan Respýblıkasyndaǵy memlekettik jáne jeke uıymdardyń qarjylyq eseptiligin tekserýge quqyly. Bul qujat Ulttyq komıssııa tarapynan beriledi, arnaıy qorǵanys dárejesine ıe jáne úmitkerdiń memlekettik aýdıtor retinde biliktiligin rastaıdy.

Memlekettik aýdıtor sertıfıkatyn rásimdeý úshin úmitker eGov.kz portalynda ótinim berip, qajetti qujattardy tapsyrýy, sondaı-aq biliktiligin rastaı otyryp, suhbattasýdan ótýi qajet.

Qyzmetti paıdalaný úshin:

— eGov.kz portalynda avtorızatsııadan ótip, «Bızneske» — «Lıtsenzııalaý jáne akkredıtteý» — «Quqyqty tirkeý (akkredıtteý) jáne sertıfıkattaý» bólimin tańdaý;

— «Memlekettik aýdıtor sertıfıkatyn berý» qyzmetin tańdap, «Onlaın suraý» batyrmasyn basý;

— ótinish berýshiniń baılanys nómiri men elektrondyq poshta mekenjaıyn kórsetý;

— sertıfıkat biliktiligin tańdap, úmitkerdiń sheteldik joǵary oqý ornynyń túlegi ekenin kórsetý (bolǵan jaǵdaıda);

— bilimi týraly qujattyń qosymshasymen birge elektrondyq kóshirmesin tirkeý;

— jeke derekterdiń ózgergenin rastaıtyn qujattyń kóshirmesin (bar bolǵan jaǵdaıda) tirkeý;

— eńbek kitapshasynyń kóshirmesin tirkep, «Ótinish jiberý» túımesin basý;

— qyzmetti qoljetimdi qol qoıý ádisteriniń birimen rastaý;

— qyzmet nátıjesi paıdalanýshynyń Jeke kabınetinde «Qyzmetterdi alý tarıhy» bóliminde qoljetimdi bolady.

Úmitker ótinimniń qaralý barysyn Jeke kabınetinde qadaǵalaı alady. Qujattardy qaraý shamamen 6 aı ýaqytty alady. Nátıjesinde úmitker suhbattasýǵa ruqsat nemese negizdelgen bas tartý týraly habarlamany alady. Bas tartý jaǵdaıynda qujattardy qaıta tapsyrý múmkindigi qarastyrylǵan.

Suhbattasýǵa 10 jumys kúni qalǵanda Qazaqstan Respýblıkasynyń Joǵary aýdıtorlyq palatasynyń saıtynda suhbattasýǵa jiberilgen úmitkerlerdiń tizimi, sondaı-aq suhbattasý ýaqyty men orny jarııalanady. Sonymen qatar, úmitkerlerge SMS-habarlama jiberiledi.

Suhbattasýdan sátti ótken jaǵdaıda, úmitker Jeke kabınetinde memlekettik aýdıtor biliktiligin berý týraly habarlamany alady, al sertıfıkat QR-kod túrinde elektrondyq formatta qoljetimdi bolady.

Jańa qyzmet QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń Memlekettik kórsetiletin qyzmetter komıteti, «Ulttyq aqparattyq tehnologııalar» AQ jáne Qazaqstan Respýblıkasynyń Joǵary aýdıtorlyq palatasymen birlesip júzege asyryldy.

Eske sala keteıik, buǵan deıin aýdıtorlar Mańǵystaý oblysynda 5,5 mlrd teńgeniń qarjylyq zańbuzýshylyqtaryn anyqtaǵanyn jazǵan bolatynbyz.