Aýdıt «ıAndeks.Taksı» tarıfin qaıta qaraýǵa mindettedi
ASTANA. KAZINFORM – Elimizdegi «ıAndeks.Taksı» qyzmeti baǵa máselesin qaıta qaraıdy.
Básekelestikti qorǵaý jáne damytý agenttigi, Tsıfrlyq damý, ınnovatsııalar jáne aeroǵarysh ónerkásibi mınıstrliginiń sala sarapshylarymen birlesip júrgizgen ıAndeks.Taksı qyzmetiniń algorıtmdik baǵa belgileý júıesine júrgizilgen aýdıt birqatar faktordy anyqtady. Atalǵan faktorlar tarıftiń ósýine ákelýi múmkin.
Aýdıttik tekserý nátıjesinde taksı qyzmeti barysynda jolaqy qunynyń qalyptasýyndaǵy ashyqtyqqa keri áser etetin táýekel bary belgili boldy. Atap aıtqanda, qalanyń vırtýaldy shekarasynyń ákimshilik shekaralarmen sáıkes kelmeýi, baǵaǵa qatysy joq parametrlerdiń áseri, mobıldi qosymshada jolaqyny esepteý týraly tolyq aqparattyń bolmaýy jáne baǵanyń áýejaıdaǵy jolaýshylardyń turǵan jerine baılanysty belgilenýi.
Buǵan deıin aýdıtten ótý mindettemesi ıAndeks.Taksı men Básekelestikti qorǵaý jáne damytý agenttigi arasynda jasalǵan monopolııaǵa qarsy komplaens sheńberinde kózdelgen bolatyn. Aýdıt júrgizýdegi maqsat — taksıge joǵary suranys kezin qosa alǵanda, jol júrý qunyna áser etetin sharttar men parametrlerdi zertteý.
Aýdıt kezinde anyqtalǵan táýekelderdiń bir bóligi joıyldy, al qalǵandary boıynsha kompanııa belgili bir mindettemeni moınyna aldy. Mysaly, «ıAndeks+» adaldyq baǵdarlamasynyń shartyna ózgerister engizildi. Endi paıdalanýshylarǵa jeńildikti usyný boıynsha barlyq shyǵyndy servıs óz moınyna alady.
Sondaı-aq komplaenske jańa erejeler engizildi. Atap aıtqanda, taksı kompanııasy monopolııaǵa qarsy zańnamany buzýdyń, negizsiz baǵa ósirýdiń jáne júrgizýshilerdiń tabysyn tómendetýdiń aldyn alýǵa baǵyttalǵan is-shara keshenin iske asyrýǵa mindetteldi.
Bıyl mamyrda «ıAndeks.Taksı» tarıftiń qymbattaýy týraly úsh kún buryn habarlaýǵa mindetti ekenin jazǵan edik.
Aıta keteıik, Qazaqstan men ıAndeks yntymaqtastyǵy aıasynda jańa jobalar iske qosylady.