Aýdıt nátıjesi: geologııalyq materıaldardy tsıfrlandyrýǵa bólingen 68 mln teńge jelge ushqan
ASTANA. KAZINFORM – QR Joǵary aýdıtorlyq palatasynyń otyrysynda geologııalyq barlaý jáne jer qoınaýyn paıdalaný salasyndaǵy ulttyq resýrstardy paıdalaný tıimdiligine júrgizilgen memlekettik aýdıttiń qorytyndylary qaraldy.
Búginde jer qoınaýyn paıdalaný elimizdiń jalpy ishki óniminiń 20%-dan astamyn qamtamasyz etip otyr. Qazaqstan hrom, temir keni, qorǵasyn, myrysh, mys, ýran, altyn, kúmis jáne ózge de paıdaly qazbalardyń baı qoryna ıe.
Alaıda aýdıt paıdaly qazbalar keshenin basqarý úderisterinde birqatar júıeli kemshiliktiń bar ekenin kórsetti.
Atap aıtqanda, ekonomıkalyq aınalymǵa naqty tartylmaǵan, tek aldyn ala baǵalanǵan, biraq rastalmaǵan qorlardyń úlesi joǵary. Bul jaǵdaı rastalǵan qorlardyń azaıýymen baılanysty. Qor ósiminiń baıaýlaýyna sebep – geologııalyq barlaýǵa qarjynyń jetkilikti bólinbeýi. Barlaý quqyǵyna lıtsenzııalyq júıe engizilgenimen, jer qoınaýyn paıdalanýshylardyń ınvestıtsııalyq belsendiligi tómen kúıinde qalyp otyr.
Sonymen qatar Ónerkásip jáne qurylys mınıstrligi geologııalyq aqparatty tsıfrlandyrý, derekterdiń tsıfrlyq bankin qalyptastyrý, qorlardy jańartý jáne jekemenshik sektordyń belsendiligin arttyrý jónindegi mindetterdi tolyq oryndamaǵany atap ótildi. Qazirgi zamanǵa saı saqtaý oryndarynyń bolmaýy mańyzdy geologııalyq derekterdiń joıylyp ketý nemese búliný qaýpin týdyrýda.
Aýdıt barysynda Geologııa komıtetiniń tarapynan baqylaýdyń bolmaýy men merdigerdiń sharttyq mindettemelerdi oryndamaýy saldarynan tsıfrlandyrý boıynsha oryndalmaǵan jumystar úshin memleket esebinen 68,2 mln teńge tólengeni anyqtaldy.
Mınıstrlik, sondaı-aq, jer qoınaýyn paıdalanýshylardyń jumys baǵdarlamalaryna mindetti salyqtyq saraptamasyz ózgerister engizýge jol bergen. Bul kompanııalarǵa salyq salý tártibin óz paıdasyna burmalap túsindirýge jáne bıýdjetke tólenetin tólemderden jaltarýǵa múmkindik bergen.
Halyqaralyq standarttarmen jumys isteıtin zamanaýı zerthanalarǵa suranystyń artýyna qaramastan, elimizde qajetti zerthanalar jetkiliksiz. Bul baǵaly metaldar men shıkizat eksportyn baqylaý sapasynyń tómendeýine alyp kelýde.
Jalpy aýdıt nátıjesinde 81 rásimdik buzýshylyq pen 16 júıeli kemshilik anyqtaldy.
Tekserý qorytyndysy boıynsha Joǵary aýdıtorlyq palata geologııalyq barlaý jáne jer qoınaýyn paıdalaný salasyn damytýǵa baǵyttalǵan naqty usynymdar men tapsyrmalar ázirledi. Olardyń oryndalý barysy baqylaýda bolady.
Aıta keteıik, Jer qoınaýyn paıdalanýshylarǵa arnalǵan memlekettik aqparattyq júıe iske qosyldy.