Aýdandardy damytýdyń bes jyldyq jospary ázirlenedi

ASTANA. KAZINFORM — Aýdandardy damytýdyń bes jyldyq josparlary ázirlenedi. Bul týraly Ortalyq kommýnıkatsııalar qyzmetindegi brıfıngte Ulttyq ekonomıka vıtse-mınıstri Baýyrjan Omarbekov aıtty.

— Memlekettik josparlaý júıesi aıasyn ózgerister engizilip, aldaǵy ýaqytta Aýdandardy damytýdyń bes jyldyq josparlaryn jasaıtyn bolamyz. Osy aýdandardy damtý josparlarynda árbir aýyldy keshendi jańǵyrtý jónindegi sharalar kózdeletin bolady. Budan basqa, «Aýyl amanaty» jobasynyń obektilerine deıin ınjenerlik ınfraqurylymdy júrgizý, kásipkerlerdi oqytý, ónimdi saqtaý, óńdeý, býyp-túıý jáne ótkizý boıynsha memlekettik qoldaýdyń jańa quraldary engizilýde. Ony qarastyryp jatyrmyz. Máselen, óndirilgen ónimderdi saqtaý jáne qaıta óńdeý ınfraqurylymyn damytý, shyǵyndardy azaıtý esebinen sharýalardyń tabysyn arttyrý, logıstıkalyq júıeni jetildirý jáne kásipkerlikti damytý maqsatynda Shaǵyn ındýstrııalyq aımaqtar qurý máselesi pysyqtalyp jatyr, — dedi vıtse-mınıstr.

Onyń atap ótýinshe, atalǵan jumystardy Ónerkásip jáne qurylys mınıstrligimen birlese otyryp, «Óndiristi damytý qory» AQ quraldary arqyly óńirlerdiń áleýmettik-kásipkerlik korporatsııalarymen júzege asyrý josparlanǵan. Qazirgi ýaqytta bul másele memlekettik organdarmen qarastyrylýda. 

— Aýyl sharýashylyǵy salasyndaǵy kadrlyq áleýetti qamtamasyz etý «Dıplommen aýylǵa» jobasy aıasynda júzege asyrylatyn bolady jáne qajet bolǵan jaǵdaıda qoldaý sharalaryn alý úshin mamandyqtar tizbesin keńeıtýge de daıynbyz, — dedi ol.

Buǵan deıin «Aýyl amanaty» jáne «Aýyl — El besigi» jobalary biriktiriletindigin jazǵan edik.