Aýdandar men monoqalalarda robototehnıka kabınetteri ashylady
«Qazaqstan halqyna» qorynyń «Bolashaq ınjenerler» baǵdarlamasy boıynsha 1-6 synyp oqýshylary baǵdarlamalaý, qurastyrý, mehatronıka, elektrotehnıka jáne basqa da baǵyttar boıynsha bilim alady. Jańa ınjenerlik daǵdylar oqýshylarǵa túrli mamandyqtardy ıgerýge jáne bolashaqta suranysqa ıe maman bolýǵa járdemdesedi. Elimiz boıynsha barlyǵy 189 robototehnıka kabıneti ashylady. Alǵashqy robototehnıka kabınetiniń tanystyrylymy Aqmola oblysynyń Qoıandy aýylynyń №2 mektebinde ótti. Mektep baǵdarlamalyq qamtamasyz etýdi, konstrýktorlardy, elektronıkany qamtıtyn robototehnıkany zertteýge arnalǵan zamanaýı baǵdarlamalyq-apparattyq keshenmen tolyqty. Kabınetti jańartýǵa 3,6 mln teńge bólindi.
Qaıyrymdylyq baǵdarlamasy «Arman Injınırıng» kompanııasymen, Injenerlik bilim berýdi damytý qorymen jáne Y.Altynsarın atyndaǵy Ulttyq bilim akademııasymen, Respýblıkalyq qosymsha bilim berý oqý-ádistemelik ortalyǵymen birlesip júzege asyrylýda.
«Arman Injınırıng» Y.Altynsarın akademııasymen robototehnıka boıynsha oqý-ádistemelik keshender ázirlep, bekitti. Kabınetterge satyp alynǵan otandyq jabdyqtarǵa akademııa jáne respýblıkalyq oqý-ádistemelik ortalyǵy tarapynan oń qorytyndy berildi. Injenerlik bilim berýdi damytý qory respýblıkalyq oqý-ádistemelik ortalyq bazasynda ustazdar úshin biliktilikti arttyrý kýrstaryn uıymdastyrdy.
«Іske asyryp jatqan baǵdarlamanyń máni kabınetti jabdyqtaý týraly emes, bilim berý úrdisin qurýǵa negizdelgen. Oqýshylarǵa zamanaýı konstrýktorlar men baǵdarlamalyq qamtamasyz etýdi usynamyz. Bul baǵdarlamalaýdy úırený jolyndaǵy quraldar. Sondyqtan biz muǵalimderdi robototehnıkaǵa ǵana emes, ınjenerlik quzyrettilikke úıretip, tolyq ádistemelik qoldaý kórsetemiz. Robototehnıkany oqyǵan bala elektrotehnık, ınternet-platformalardy ázirleýshi, ushý apparattaryn qurastyrýshy bola alady, ıaǵnı ınjenerlik bilimniń arqasynda ol kóptegen mamandyqtardy ıgeredi. Qarapaıym ınjenerden bastap avtomattandyrylǵan kásiporynnyń basqarýshysyna deıingi qyzmet ıesi atanýǵa múmkindigi bar», – dedi «R:ED – Robotics Education» robototehnıkanyń halyqaralyq baǵytynyń basqarýshy dırektory Maksım Sýshkov.
«Bolashaq ınjenerler» qaıyrymdylyq baǵdarlamasynyń alǵashqy nátıjesin bir jyldan keıin baǵalaýǵa bolady. Bolashaq ınjenerler daǵdylary men bilimderin tanytý úshin robototehnıka boıynsha respýblıkalyq olımpıada uıymdastyrý josparlanýda. Respýblıkalyq kezeńniń jeńimpazdary halyqaralyq baıqaýǵa qatysa alady.
«Bir qaraǵanda robototehnıka boıynsha RED qurastyrýshylary, elektronıka bólshekteri bar bir shaǵyn kabınet sııaqty. Biraq mundaı jobanyń áleýeti zor. Balalar robototehnıka arqyly baǵdarlamalaýdy ıgeredi. Baǵdarlamalaý – bolashaqtyń mamandyǵy bolǵanymen, ol qazirgi kúnniń mamandyǵyna aınaldy. Mysaly, búginde naryqta qarjygerlerden góri qarjy men baǵdarlamalaýdy qatar biletin mamandar úlken suranysqa ıe. Óıtkeni, baǵdarlamashylar barlyq salalarda qajet jáne suranysqa ıe. Olar búgin ónim ázirleý arqyly bolashaqty qalyptastyrady», – dep atap ótti Qordyń Basqarma tóraǵasy Bolat Jámishev.
Aıta ketsek, «Bolashaq ınjenerler» baǵdarlamasy boıynsha robototehnıka kabınetteri Qazaqstannyń barlyq oblysynda árbir aýdanda jáne monoqalada qurylatyn bolady. Jobanyń maqsaty – aýyldyq jerlerdegi jáne monoqalalardaǵy balalarǵa robototehnıkany zerdeleý úshin resýrstyq ortalyq qurý, ınjenerlik quzyretter salasynda qoljetimdi sapaly bilim berý ortasyn qamtamasyz etý.
Baǵdarlamany iske asyrýǵa «Qazaqstan halqyna» qory jalpy somasy 673,2 mln teńge, «Arman Injınırıng» kompanııasy jáne Injenerlik bilim berýdi damytý qory 464,5 mln teńge bóldi.
