Aýdan ákimi qyzmetkerdi urdy: Shymkent ákimdigi jelide taraǵan vıdeoǵa túsinik berdi
ShYMKENT. KAZINFORM – Qazirgi ýaqytta oqıǵanyń barlyq mán-jaıyn anyqtaý úshin qyzmettik tekserý júrgizilip jatyr.
Áleýmettik jelide Shymkent qalasyna qarasty Qarataý aýdany ákiminiń qyzmetkerge kúsh qoldanǵany kórsetilgen vıdeo tarady.
Osyǵan baılanysty Shymkent qalasy ákimdigi resmı túsinik berdi.
– Áleýmettik jelide qaladaǵy aýdan ákimderiniń biri qatysqan bolýy múmkin oqıǵa beınelengen vıdeo taralyp jatyr. Atalǵan derek boıynsha oqıǵanyń barlyq mán-jaıyn jan-jaqty ári obektıvti anyqtaý maqsatynda qyzmettik tekserý júrgiziletinin habarlaımyz, – delingen ákimdik taratqan aqparatta.
Sondaı-aq qala ákimdigi zańdylyqty saqtaý, qyzmettik ádep qaǵıdattaryn ustaný jáne kez kelgen quqyqqa qaıshy áreketterge jol bermeý ustanymyn basshylyqqa alatynyn málimdedi.
– Eger taralǵan beınejazbada kórsetilgen jaıttar rastalsa, Qazaqstan Respýblıkasynyń qoldanystaǵy zańnamasyna sáıkes tıisti sharalar qabyldanady. Tekserý aıaqtalǵanǵa deıin asyǵys qorytyndy jasamaýdy suraımyz. Nátıjeleri týraly qosymsha habarlanady, – dep jaýap berdi vedomstvo.
Budan buryn Pavlodar oblysynda mas kúıinde kólik júrgizgen sheneýnik jumystan shyǵarylatynyn jazǵan edik.