Atyraýlyqtar nelikten jaryqsyz qaldy
«Mańǵystaý atom energetıkalyq kombınatynyń №1 energııa blogynyń apattyq jaǵdaıda ajyratylýyna baılanysty jıiliktiń tómendeýi baıqaldy. Osyǵan baılanysty Atyraý oblysynyń elektr stantsııalary oqshaýlanǵan jumys rejımine kóshti. Bul rejım «Teńizshevroıl», NCOC kompanııalary men «Atyraý jylý-elektr ortalyǵy» AQ-da iske qosyldy. Al, Atyraý qalasynyń sol jaq jaǵalaýyndaǵy Damby aýylynan ortalyqtaǵy shaǵynaýdandar men Talǵaırań eldimekenine deıingi aralyǵy elektr jaryǵymen tolyq qamtyldy. Qazir «Atyraý jylý-elektr ortalyǵy» AQ-dan shyǵatyn 35 kV jelisi qosyldy. Endi Atyraý qalasynyń qosalqy stantsııasynan shyǵatyn fıderler qosylady», - dep málim etti energetıkalyq keshenniń baspasóz qyzmetinen.
Eske sala ketelik, buǵan deıin Atyraýda birneshe shaǵynaýdanda jaryq sónip qalǵanyn habarlap edik. «Balaýsa», «Rakýsh», «Leshoz», «Avangard» pen «Nursaıa», «Jeruıyq», «Aqsaı», «Juldyz», «Kóktem», «Balyqshy» shaǵynaýdandarynda jaryq óshken.
Sondaı-aq, Elektr qýatynyń joqtyǵynan Atyraý munaı óńdeý zaýyty jumysyn toqtatty. Zaýyttyń qoǵammen baılanys tobynyń málimetinshe, elektr jelisindegi aqaýdyń saldarynan qondyrǵylardyń jumysy apattyq jaǵdaıda toqtatylǵan.
«Atyraý munaı óńdeý zaýyty búgin, 3 shilde kúni jergilikti ýaqytpen saǵat 17:25-te jumysyn toqtatty. Buǵan «KEGOC» AQ tarapynan elektr energııasynyń óshirilýi sebep boldy. Tehnologııalyq reglamentke sáıkes apatty jaǵdaıdyń aldyn alý maqsatynda elektr energııasynyń syrtqy jelilerin tolyq qalpyna keltirgenge deıin zaýyttyń otyn jelisi fakelge jiberildi. Aqaýlardy joıý nátıjesi týraly qosymsha habarlanady», - dep málim etti zaýyttyń qoǵammen baılanys bóliminen.
Al, erteń Atyraýdyń 25 kóshesinde kúni boıy elektr qýaty bolmaıdy.
