Atyraýlyqtar Kórisý kúnin atap ótti

ATYRAÝ. QazAqparat – Atyraý jurtshylyǵy Kórisý kúnine oraılastyrylǵan «Amal keldi – jyl keldi» mádenı-kópshilik is-sharasyn tamashalady, dep habarlaıdy QazAqparat.

Búgin Prezıdent qazaqstandyqtardy Amal merekesimen quttyqtap, «Kóktemniń alǵashqy lebin ala keletin bul kúndi jurtshylyq ejelden asyǵa kútken. Eldik pen yntymaqqa shaqyratyn osy meıram – ultymyzdyń baýyrmaldyq saltynyń jarqyn kórinisi. Jyl berekeli bolsyn, aǵaıyn!», -degen edi.

Atyraýda Mahambet Ótemisuly atyndaǵy akademııalyq qazaq drama teatrynyń aldyndaǵy alańǵa qos kıiz úı tigildi. Alańǵa jınalǵan jurtshylyq «Amal keldi – jyl keldi» atty mádenı-kópshilik is-sharany tamashalady.

Kontserttik baǵdarlama «Kórisý» atty teatrlandyrylǵan qoıylymmen ashyldy. Oblys ákimi Serik Shápkenov atyraýlyqtardy áz Naýryzdyń jarshysy – Kórisý kúnimen quttyqtady.

«Biz úshin búgin – erekshe kún! Bul kúni tek kóktemmen birge tirshilik oıanyp qana qoımaı, qystan aman shyqqan halyq aǵaıynnyń amandyǵyn biledi. Pendeshilikke salynyp arazdasqan jandar bir-birin keshirip, tatýlasady. Memleket basshysy Qasym-Jomart Toqaev aıtqandaı, órkenıeti damyǵan elderdiń mádenıeti aralasqanda ózimizdiń mádenı qundylyqtarymyzdy joǵaltyp almaı, berik saqtaýymyz kerek. Kórisý – ata-babamyzdan boıymyzǵa bitken tekti dástúr. Ony eshqashan umytpaı, jastarǵa dáripteýimiz kerek» ,-dedi Serik Shápkenov.

Merekelik is-shara M.Ótemisuly atyndaǵy akademııalyq qazaq drama teatr ártisteriniń ónerimen jalǵasty. Ártister kórisý saltyn sahnalap, sal-seriler ónerin ortaǵa saldy. Jigitter men qyzdar aıtysyn kórsetti. Aqsaqaldar aq batasyn berip, jas kelinder qonaqtarǵa shashý shashty.