Atyraýlyq volonterler úzdikter qatarynan kórindi

ATYRAÝ. QazAqparat- Ulttyq volonterler jelisi uıymdastyrǵan «Qazaqstannyń úzdik eriktisi - 2019» syılyǵynda atyraýlyq volonterler júldeger atandy, dep habarlaıdy QazAqparat tilshisi.

Uıymdastyrýshylardyń sózine sensek, atalǵan syılyqqa eriktilerdiń ózinen de, olardyń jumysyn retteıtin uıymdardan da - barlyǵy 200-den astam ótinish túsken.

Úzdikterdiń úzdigi on atalym boıynsha tańdaldy. Osylaısha, «Medıtsınadaǵy eriktilik» atalymyndaǵy úsh jeńimpazdyń qatarynda atyraýlyq Arman Qasymov ta bar.

Arman Qasymov on jyldan astam ýaqyt Atyraý jedel járdem beketinde erikti bolyp qyzmet kórsetedi. Qolynda sheteldik joǵary oqý ornynyń dıplomy bolǵanyna qaramastan, qatardaǵy erikti-sanıtar bolyp bastady. Jedel járdem kólikterin jýdy, dári-dármek qobdıshalaryn toltyrdy, zembilderdi kóterisip, tipti, kezekti bir jedel shaqyrtý kezinde júkti áıeldi bosandyryp ta aldy.

Arman osy ýaqyt aralyǵynda kóptegen atyraýlyqtardyń erikti bolýǵa degen qulshynysyn oıatty. Elimizde tuńǵysh ret mektep oqýshylarynan quralǵan alǵashqy kómek kórsetý eriktiler tobynyń qurylýyna atsalysty.

Al, «Korporatıvti eriktilik» atalymynda «Yntymaq» qoǵamdastyqty damytý baǵdarlamasynyń jetekshisi Maııa Shamenova úzdikter qatarynan kórindi.

«Yntymaq» - 2012 jyldan beri «Teńizshevroıldyń» qoldaýymen jumys istep kele jatqan uıym. Uıym músheleri eriktiliktiń birneshe baǵyty boıynsha jumys istep júr. Onyń ishinde qaıyrymdylyq is-sharalary, bilim berý, áleýmettik jáne ekologııalyq jobalar bar. Aǵash otyrǵyzady, joq-jitikke kómek qolyn sozady, tipti, qoqys ta jınaıdy. Al, osydan birneshe jyl buryn top eriktileri qaırańǵa shyǵyp qalǵan on myńdaı balyq shabaǵyn qutqarǵan bolatyn.

Aıta ketelik, jeńimpazdar 11 jeltoqsan kúni Nur-Sultan qalasynda ótetin «Eriktiler forýmy - 2019» is-sharasynda resmı marapattalady.