Atyraýlyq oqýshysy aloe ósimdiginen sýsabyn men ıogýrt jasap shyǵardy
Oblystyq bilim basqarmasy baspasóz qyzmetiniń málimetine qaraǵanda, Jylyoı aýdanynyń ortalyǵy – Qulsary qalasynda turatyn 9-synyp oqýshysy Nurdáýlet Mandııarov aloe ósimdiginen bet kútimine maska, sýsabyn men balalarǵa arnalǵan ıogýrt jasap shyǵarǵan.
Qazir ol №8 jalpy bilim beretin orta mektepte oqıdy. Ol bos ýaqytynda aloe ósimdigin zerttep, onyń qasıetin joǵaltpaı, quramyndaǵy elementter saqtalǵan qoljetimdi ónim alý baǵytyndaǵy ǵylymı jobany iske asyrǵan. Onyń aıtýynsha, aloe ósimdigi arqyly barlyq aýrýlardy emdeıtin dárilik zattar shyǵarýǵa bolady.
«Ǵylymı jobamnyń taqyryby – «Densaýlyq pen sulýlyq kepili – aloe». Atalǵan ósimdiktiń paıdasy ushan-teńiz. Qazirgi ýaqytta ekologııanyń naşarlaýyna baılanysty teri, asqazan aýrýlary, túrli allergııalar kóp kezdesedi. Sondyqtan atalǵan aýrýlarǵa qarsy aloe ósimdiginen otandyq ónimder shyǵarsam degen nıetim bar. Bolashaqta osy baǵyttaǵy jobamdy jalǵastyryp, ǵylymı jańalyq ashqym keledi», - deıdi jas ǵalym Nurdáýlet Mandııarov.
Oqýshynyń ǵylymı jetekshisi, hımııa pániniń muǵalimi Farıda Mashyryqova shákirtiniń bolashaǵynan zor úmit kútetinin jasyrmaıdy.
«Nurdáýlettiń ǵylymı joba aıasynda tájirıbelik múmkindigin synap kórýi joǵary nátıje kórsetti. Ol aloedan daıyndalǵan ónimniń tabıǵılyǵy men paıdaly ekenin ǵylymı turǵydan dáleldedi. Onyń maqsaty – ósimdikten qoljetimdi ónimder ázirlep, kúndelikti qoldanysqa engizý. Bul baǵytta kóp izdendi. Zertteýshilik daǵdysynyń joǵary deńgeıde ekenin tanytqan oqýshy bul jobany ǵylymı zertteý nysanasyna aınaldyrady» - deıdi Farıda Mashyryqova.
Eske sala ketelik, budan buryn atyraýlyq oqýshylardyń ǵylymı jumysy halyqaralyq jınaqqa engen edi.
