Atyraýlyq 3 stýdent Konstıtýtsııany jatqa aıtyp, bilim grantyn jeńip aldy
Atyraý qalasynda «Konstıtýtsııany jatqa bilemin!» atty dástúrli baıqaý uıymdastyryldy. Ol bıyl tórtinshi ret ótkizilip otyr. Atyraý oblysy Іshki saıasat basqarmasynyń qoldaýymen ótken baıqaýǵa 16 JOO-dan stýdentter qatysty. 
Bilim saıysyn ashqan oblystyq ishki saıasat basqarmasy basshysynyń orynbasary Saǵadat Ájiǵalıev Konstıtýtsııanyń eldegi ishki tártipti, azamattardyń erik-jigeri men bostandyqtaryn belgileıtin birden-bir qujat ekenin aıta kelip, qatysýshylarǵa sáttilik tiledi.
«Baıqaý eki kezeńnen turady. Birinshisinde qatysýshylar onlaın-test synaǵynda quqyqtyq saýattylyqtaryn sarapqa saldy. Synnan súrinbeı ótken jeteýi ekinshi kezeńge joldama aldy. Kelesi kezeńde olar bılet sýyryp, onda kórsetilgen bapty túgel jatqa aıtyp shyqty», - deıdi shara uıymdastyrýshylary.
Aıta ketelik, baıqaý qorytyndysy boıynsha 3 stýdent Nurdáýlet Baǵytjan, Gúlnur Galıeva men Nazerke Nurmuqanovalar H.Dosmuhamedov atyndaǵy Atyraý memlekettik ýnıversıtetiniń 1 jyldyq oqý grantyna ıe boldy.
