Atyraýǵa ózge óńirlerden kelgen muǵalimderge páter berildi

ATYRAÝ. QazAqparat – Byltyr Atyraýǵa ózge óńirlerden 9 muǵalim kelgen. Onyń ishinde 5 muǵalimge páter berildi, dep habarlaıdy QazAqparat.

Atyraý oblysy ákiminiń orynbasary Jasulan Bısembıevtiń aıtýynsha, Úkimettiń «Muǵalimder tapshylyǵy bar óńirlerge úzdik pedagogterdi tıisti qoldaý sharalarynyń paketimen tartý qaǵıdalaryn bekitý týraly» qaýlysyna sáıkes Atyraý oblysynda jumys isteýge 9 pedagog nıet bildirgen. Muǵalimder elimizdiń ár óńirinen kelgen.

«Atyraý oblysyndaǵy mektepterge jumys isteýge kelgen 9 muǵaoimniń beseýine jańa páterdiń kilti berilip otyr. Máselen, olardyń arasynda Batys Qazaqstan oblysynan tarıh pániniń muǵalimi Aınagúl Erejepova, fızıka pániniń muǵalimi Valentın Kozlov, Shyǵys Qazaqstan oblysynan tarıh pániniń muǵalimi Symbat Qabysheva, Aqtóbe oblysynan Qaısar Nurtanov, bastaýysh synyp muǵilimi Gúlúzim Amangeldi bar. Qazir basqa óńirlerden kelgen muǵalimderdiń alańsyz jumys isteýine barlyq jaǵdaı jasaldy. Olarǵa arnaıy baǵdarlamaǵa sáıkes laýazymdyq jalaqysyna 150 paıyz mólsherindegi qosymsha yntalandyrý aqysy tólenip otyr», -deıdi Jasulan Bısembıev.

Máselen, Batys Qazaqstan oblysynan kelgen Valentın Kozlov Atyraý qalasyndaǵy J.Qarajigitov atyndaǵy №16 mektep-lıtseıine jumysqa ornalasqan.

«Bizdiń tańdaǵan mamandyǵymyz muǵalimdik bolǵandyqtan, basty maqsatymyz – sanaly, bilimdi urpaq tárbıeleý. Shákirtterimiz úzdik oqýymen tanylyp, túrli saıystardan júldeli oryndardy ıelense, bul biz úshin úlken mártebe bolar edi. Atyraýǵa osyndaı maqsatpen kelgen edik. Bizge jergilikti basshylar tarapynan baspana berilip, úlken qoldaý kórsetilip otyr», -deıdi J.Qarajigitov atyndaǵy №16 mektep-lıtseıiniń muǵalimi Valentın Kozlov.

Eske sala ketelik, buǵan deıin Atyraý oblysynda «Jaıly mektep» aıasynda 12 bilim ordasy salynatynyn jazǵan edik.