Atyraýǵa esirtki satýǵa kelgen qaraǵandylyq kelinshek ustaldy

ATYRAÝ. QazAqparat – Atyraýda esirtki tasymaldaǵan qaraǵandylyq turǵyn ustaldy, dep habarlaıdy QazAqparat.

Oblystyq polıtsııa departamentiniń bastyǵy Nurhat Orazbaevtyń aıtýynsha, Qaraǵandy qalasynan esirtki tasymaldaý maqsatymen kelgen áıeldiń jasy – 32-de.

«Esirtki qylmysyna qarsy is-qımyl basqarmasynyń qyzmetkerleri 5 aqpanda ​ «Quqyqtyq tártip» jedel is-sharasy kezinde 1990 jylǵy kúdiktini ustady. Kúdiktiniń ózi men jaldamaly páterin tintý kezinde 70 dana sıntetıkalyq esirtki zaty, esirtki daıyndaýǵa arnalǵan quraldar tabylyp, tárkilendi. Al, tergeý barysynda kúdikti qala aýmaǵynda jasyrylǵan 70 gramm esirtki zatyn kórsetti. Jasyryn esirtki tasymaldaýmen aınalysqan áıel sıntetıkalyq esirtki zattaryn satý úshin Qaraǵandy qalasynan Atyraýǵa arnaıy kelgen», -dep málim etti Nurhat Orazbaev.

Qazir ustalǵan kúdiktige qatysty QR Qylmystyq kodeksiniń 297-babynyń 3-bóligimen (Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý) qylmystyq is​ tirkeldi.

Ózge aqparat QR Qylmystyq-protsestik kodeksiniń 201-babyna sáıkes jarııalaýǵa jatpaıdy.

Eske sala ketelik, buǵan deıin Atyraýda kóligin mas adamǵa aıdaýǵa bergen áıelge 428 myń teńge aıyppul salynǵanyn jazǵan bolatynbyz.