Atyraýdyń Jylyoı aýdanynda qos balabaqsha paıdalanýǵa berildi
Balabaqshanyń ashylý saltanatyna aýdan, qala jáne aýyldyq okrýg ákimderi men qala turǵyndary, «Teńizshevroıl» kompanııasynyń ókilderi qatysty.
«Búgingi urpaq - erteńgi bolashaǵymyz. Búgingi kúni ár balanyń, ár azamattyń júreginde tárbıeniń negizin qalaýshy - balabaqsha. Táýelsiz elimizdiń keleshegin tárbıeleý - búgingi kúnniń ózekti máselesi. Búgin kıeli Jylyoı jerinde baldyrǵandardyń úlken meıramy. Elordamyz Astananyń 20 jyldyq mereıtoıy qarsańynda 290 oryndyq balabaqsha kishkentaı búldirshinderimizge esigin aıqara ashpaq. Bala tárbıesi - úlken, jaýapty is. «Balany besikten» dep qazaq halqy beker aıtpaǵan. Elin súıýge, ımandylyqqa, qazaq tilin qadir tutýǵa úıretýdiń mańyzy zor. Osy qasıetterdi «Búldirshin» balabaqshasynyń tárbıeshileri balalardyń boıyna sińirý baǵytynda jumys jasaıtynyna senimdimiz»,-dedi aýdan ákimi Azamat Beket.
«Teńizshevroıl» JShS-nyń negizgi kúrdeli jobalar bóliminiń basty aktıvter jónindegi menedjeri Rama Kantamnınıdiń aıtýynsha, 1993 jyldan beri TShO-nyń Atyraý oblysyndaǵy áleýmettik jobalar men baǵdarlamalardy, jergilikti turǵyndar men qyzmetkerlerge kómek kórsetýdi qarjylandyrýǵa bólgen aqshasy 1,4 mlrd teńgeden asqan eken. Kásiporyn óziniń «Igilik» erikti áleýmettik ınfraqurylym baǵdarlamasy arqyly Atyraý oblysynda 110 jobany iske asyrdy. Ótken jyly da mektep, balabaqsha, mádenıet úıleri men túrli sport keshenderin salýǵa 25 mln AQSh dollaryn jumsaǵan.
Balabaqsha qurylysyn júrgizgen merdiger «Orlan» JShS bas dırektory Kenjebek Myrzaǵalıev jańa ǵımarattyń sımvolıkalyq kiltin balabaqsha basshysyna saltanatty túrde tabys etti. Aýdan ákimi men TShO kompanııasynyń ókili jańa ǵımarattyń lentasyn qıyp, saltanatty túrde ashty. Kelesi kezekte aýdan ákimi bastaǵan top «Avtojolshylar» yqshamaýdanyndaǵy 290 oryndyq «Shuǵyla» balabaqshasynyń ashylý saltanatyna qatysty.