Atyraýdaǵy túrmede sottalǵan 200-den astam adam jumyspen qamtylǵan
Atyraý oblysy prokýrorynyń orynbasary Nurjan Serikulynyń aıtýynsha, sottalǵandardy qaıta tárbıeleýdiń bir tetigi – jumyspen qamtý.
«Osyǵan baılanysty Qylmystyq-atqarý júıesi departamentimen birge penıtentsıarlyq mekemelerge bıznes ıelerin tartyp, sottalǵandardy jumyspen qamtý maqsatyndaǵy jumystar júrgizilip jatyr. Qazir «Eńbek-Batys» fılıaly men 14 bıznes sýbektisiniń kıim tigý, qaǵaz, aǵash, temir buıymdaryn shyǵaratyn, tamaq ónimderin daıyndaıtyn tsehtarynda 200-den astam sottalǵan adam jalaqysy tólenetin jumystardy isteıdi. Bul olarǵa óz bereshegin óteýge jáne týystaryna kómektesýge múmkindik beredi», - dep habarlady Nurjan Serikuly.
Onyń aıtýyna qaraǵanda, túzeý mekemelerinde jumysqa ornalasý eńbek zańnamasymen retteledi. Qamaýda otyrǵan ár adamnyń bos jumys ornyna ornalasýǵa quqyǵy bar.
«Bas bostandyǵynan aıyrý oryndarynda kásip ashý bıznes sýbektilerine kóptegen artyqshylyqtar beredi. Bul – daıyn ınfraqurylym, obekti men jabdyqtardy qorǵaý, jaldaý aqysynyń tómendigi, sottalǵandardyń arasynan bilikti jumys kúshimen qamtamasyz etý. Jumys berýshi sottalǵan adamdardy jumysqa qabyldaý týraly sheshimdi ózi qabyldaıdy», - dep máli etti N.Serikuly.
Eske sala ketelik, budan buryn Atyraýdaǵy túzeý mekemelerine 16 elektrondy termınal ornatylǵanyn habarlaǵan bolatynbyz. Bul sottalǵandardyń prokýratýraǵa jáne basqa da memlekettik organdarǵa ótinish berý rásimin jeńildetedi.
