Atyraýdaǵy perzenthanada 101 jas ana daýys berdi

ATYRAÝ. QazAqparat - QR Parlamenti Májilisiniń jáne máslıhattar depýtattarynyń kezekti saılaýynda Atyraý oblystyq perınataldyq ortalyǵy men Atyraý qalalyq perzenthanasynda jatqan 101 jas ana daýys berip, tańdaý jasady. Bul týraly QazAqparat Atyraý oblystyq densaýlyq saqtaý basqarmasynyń baspasóz qyzmetine silteme jasap habarlaıdy.

Atyraý oblystyq perınataldyq ortalyǵy men qalalyq perzenthanada jatqan júkti áıelder tańǵy saǵat 7.00-den bastap daýys bere bastady. Olar QR memlekettik Ánuranyn oryndap, saıası naýqannyń sátti ótkizilýine jumyla kiristi.

Oblystyq perınataldyq ortalyqtan - 30, qalalyq perzenthanadan - 71 jas ana óz daýystaryn berdi.

Jetinshi perzentin dúnıege ákelgen Aınur Tólemisova alǵash ret perınataldyq ortalyqta saılaýǵa qatysqanyn aıtyp, óz pikirin bildirdi.

«Perzenthanada sábıimmen birge jatqanyma búgin ekinshi kún. Búgin el úshin mańyzdy qadamdy osynda jasadym. Saılaý ýchaskesine barmaı-aq, osyndaı múmkindik jasalǵanyna alǵys aıtqym keledi. Óz tańdaýymdy jasadym», - deıdi.

Aınur Tólemisovanyń aıtýynsha, ul-qyzdarynyń aldy joǵary oqý ornynda oqıdy. Ár balasynyń esimin belgili tulǵalardyń ataǵyna, dańqyna baılanystyryp qoıǵan. Osy joly saıası naýqan qarsańynda dúnıege kelgen sábıdiń esimin uzaq oılastyrypty. Jas ana Saılaý nemese Saılaýbek dep esim qoıatyndardy qoldamaıtynyn aıtady. Esim balanyń bolashaǵyna tikeleı baılanysty áser etedi, sondyqtan maǵynaly durys esim bolýy kerek deıdi. Sábıdiń salmaǵy: 3 keli 150 gramm, boıy -51 sm.