Atyraýdaǵy áskerı garnızonǵa 100 jas sarbaz keldi
Atyraý garnızony baspasóz qyzmetiniń málimetinshe, kóktemgi shaqyrý aıasynda Túrkistan men Almaty oblysynan 100 jas sarbaz áskerı bólim qataryn tolyqtyrǵan. Áskerı bólimge kelgennen keıin jas sarbazdar koronavırýstyq ınfektsııaǵa qarsy tekserilip, karantınge oqshaýlandy. Olar bir aı ishinde alǵashqy áskerı daıyndyq baǵdarlamasyn meńgeretin bolady.
«Bólimshede jas tolysym úshin barlyq jaǵdaı jasalyp, kazarma qory daıyndalǵan. Jas sarbazdarmen jıyn ótkizýge arnaıy ákimshilik taǵaıyndaldy. Oǵan tájirıbeli ofıtserler men serjanttar kiredi. Olar sarbazdarǵa áskerı istiń negizderin úıretip qana qoımaı, jańa jaǵdaıǵa beıimdelýge kómektesedi», - deıdi rota komandıri, kapıtan Nurbek Aıtqalıev.
Jas sarbazdardyń bári áskerge óz erkimen nıet bildirip kelgen. Olardyń arasynda Túrkistan oblysynan shaqyrylǵan Jasulan Batrashev ta bar.
«Men mindetti áskerı qyzmetke barýǵa nıet bildirdim. Bul tańdaýyma ata-anam qarsy bolmaı, qoldaý bildirdi. Áskerı qyzmettiń alǵashqy kúninen ofıtserler men serjanttardyń jas sarbazdarǵa degen oń kózqarasy unady. Olar bizge tártip pen áskerı isti úıretýde. Biz kúndelikti áskerı tártipke birtindep úırene bastadyq. Sonymen qosa, sarbazdar ashanasyndaǵy tamaqtanýdyń jaqsy deńgeıin atap ótkim keledi», - deıdi Jasulan Batrashev.
Qazir jas sarbazdar áskerı ómirdiń qyr-syrymen tanysa bastady. Olar kóptegen nusqaýlyq pen ádistemelik sabaqtarǵa qatysady. Sodan soń Otannyń tolyqqandy qorǵaýshysy ataný úshin áskerı ant beredi.
