Atyraýdaǵy 14 jasar júrgizýshiniń qazasyna baılanysty ІІM úndeý jasady
«Joldaǵy balalardyń qaýipsizdigi árqashan polıtsııanyń baqylaýynda bolady. Túsindirý jumystaryna qaramastan, apattyń sebebi balalar bolyp tabylatyn jol-kólik oqıǵalary azaımaı otyr.
Ókinishke qaraı, qazirgi zamanaýı ata-ana tárbıesi balalarǵa kóptegen erkindik beredi. Ol óz kezeginde qaıǵyly jaǵdaıǵa aınalýy múmkin. Ata-analar balalardyń «synaq pen qatelik» arqyly úırený qabiletin asyra baǵalaıdy. Keı jaǵdaılarda ata-analar qaýipsizdik týraly oılamaı, balalaryna avtokólik kiltterin beredi. Bul derekter kámeletke tolmaǵandardyń jáne jol júrisine qatysýshylardyń ómirine qaýip tóndiredi.
Jyl basynan beri Qazaqstanda jasóspirimderdiń kólik tizgindeý áreketterinen 70-ten astam jol-kólik oqıǵasy oryn aldy, onda 10-nan astam adam qaza taýyp, 90-nan astam adam jaralandy. Máselen, keshe Atyraý oblysynda Jastalap aýylynyń janyndaǵy jolda Toyota avtokóliginiń kámeletke tolmaǵan júrgizýshisi nebári 14 jasta bolǵandyqtan basqarýǵa ıe bolmaı, aýdarylyp qaldy. Saldarynan bala qaıtys boldy, al onyń 4 jasóspirim jolaýshysy aýrýhanaǵa tústi.
Osyǵan baılanysty ІІM kólik quralyn basqarý quqyǵy joq adamǵa bergeni úshin jaýapkershilik týraly eskertedi (ÁQBtK-niń 612-babynyń 5-bóligi).
Sondyqtan ata-analarǵa dál búgin, keıinge qaldyrmaı, balalarmen jol qaýipsizdiginiń negizgi qaǵıdalaryn talqylaýǵa keńes beriledi. Bul keńester balanyń jadynda saqtalady jáne qaýipti jaǵdaılardyń táýekelin azaıtady», – dedi ІІM ÁPK-niń erekshe tapsyrmalar jónindegi aǵa ınspektory Aqtoty Boranova.
