Atyraýda Jaıyq ózenine sýǵa túsken eki adam jaýapkershilikke tartyldy

ATYRAÝ. QazAqparat – Atyraýda Jaıyq ózenine sýǵa túsken eki er adam ákimshilik jaýapkershilikke tartyldy, dep habarlaıdy QazAqparat.

Oblystyq polıtsııa departamenti baspasóz qyzmetiniń málimetinshe, 26 naýryzda eki er adam Jaıyq ózenine túsken.

Atyraý qalalyq polıtsııa basqarmasyna jedel basqarý ortalyǵynyń beınebaqylaý qyzmetkerleri saǵat 14:43 shamasynda Jaıyq jaǵalaýynda belgisiz adamdardyń sýǵa túsip jatqanyn baıqaǵan.

Soǵan baılanysty ýchaskelik polıtsııa qyzmetkerlerine baǵyttama bergen.

«Tártip saqshylary tekserý kezinde belgilenbegen jerde sýǵa túsken 33 jáne 42 jastaǵy er adamdy anyqtady. Olar QR Ákimshilik quqyq buzý kodeksiniń 364-babymen ákimshilik jaýapkershilikke tartyldy», -dep habarlady departamenttiń baspasóz qyzmeti.

Eske sala ketelik, buǵan deıin Atyraýda polıtseıden qashqan júrgizýshi kólikten túsip, Jaıyqqa sekirgenin jazǵan bolatynbyz.