Atyraýda jastar qar kúreýshilerge ystyq taǵam ákeldi
Bul aktsııany «Atyraý-Aqparat» medıaholdıngi men «Coffee River» kompanııasy birlesip uıymdastyrǵan.
Atyraý qalalyq ákimdigi baspasóz qyzmetiniń málimetinshe, qala kóshelerin qardan tazartý jumysyna 90-nan astam jumysshy men 22 tehnıka jumyldyryldy.
«Qazir Azattyq, M.Áýezov, Q.Sátbaev, Abaı, Qurmanǵazy jáne L.Vladımırskıı kósheleriniń qary kúrelip jatyr. Bul jumysqa taǵy 5 tehnıkany tartýdy josparlap otyrmyz», - dep habarlady qalalyq ákimdik.
Atyraý qalasynda sońǵy ret mundaı qalyń qar 2006 jyly jaýǵan. Kesheden beri kóshelerdi qardan tazartý júrgizilip jatyr.
«17 qańtarda qaladan 472 tekshe metr qar shyǵaryldy. Kóshelerdi tazartý túni boıy jalǵasty. Qardy jınap, shyǵarýǵa 49 tehnıka jumyldyryldy. Tehnıkany qalalyq kommýnaldyq mekemelermen birge, ózge de kásiporyndar usyndy. Sondaı-aq, kósheler men trotýarlardy tazalaýǵa 90 adam tartyldy. Qala mańyndaǵy Almaly, Atyraý, Damba jáne Tasqala kentterine joldardy qardan tazalaýǵa arnalǵan tehnıkalar jiberildi», -dep habarlady qalalyq ákimdik.
