Atyraýda jasóspirim traktordyń bagyna shubat quıyp ketken, ákesi aıyppul arqalady
Atyraý oblysynyń kámeletke tolmaǵandar isteri jónindegi mamandandyrylǵan aýdanaralyq sotynyń málimetinshe, kámeletke tolmaǵan jasóspirim ákimshilik quqyq buzýshylyq jasaǵan. Bul is QR Ákimshilik quqyq buzýshylyq týraly kodeksiniń 435-babymen qaralǵan.
«Ákimshilik quqyq buzýshylyq týraly hattamaǵa sáıkes, kámeletke tolmaǵan bala «Spektor» baý-baqsha qoǵamyna tıesili traktordyń maı quıatyn bólshegine shubat quıyp, qoǵamdyq tártipti buzǵan. Sot otyrysynda jasóspirimniń zańdy ókili – ákesi kinásin tolyq moıyndap, jeńil jaza taǵaıyndaýdy surady. Sot kámeletke tolmaǵan bala ákesiniń materıaldyq jaǵdaıyn, kinásin tolyq moıyndaǵanyn eskerdi. Oǵan ákimshilik aıyppul somasy 30%-ǵa qysqartylyp, 16 905 teńge mólsherinde aıyppul túrindegi ákimshilik jaza qoldanyldy», - dep habarlady mamandandyrylǵan aýdanaralyq sottyń baspasóz qyzmeti.
Sot qaýlysy zańdy kúshine endi.
Eske sala ketelik, budan buryn Atyraýda bir top jasóspirim qatarlasyn aıaýsyz soqqyǵa jyqqanyn habarlaǵan bolatynbyz. Polıtsııa departamentiniń baspasóz qyzmetinen málim etkendeı, olar Atyraý qalasyndaǵy kolledj jataqhanasynyń janynda 2007 jylǵy qatarlasyn jaraqattaǵan. Osy derekke qatysty QR Qylmystyq kodeksi 293-babynyń 2-bóligine sáıkes tergeý júrgizilip jatyr. Sot-medıtsınalyq saraptama taǵaıyndaldy. Kúdikti retinde 2006 jáne 2007 jylǵy jasóspirimder ustalyp, Atyraý qalasyndaǵy №2 polıtsııa bólimine jetkizilgen.
