Atyraýda «Uly dala jaýharlary» kórmesi ashyldy
Munaıly ólkede Elbasynyń «Uly dalanyń jeti qyry» maqalasy aıasynda Sh. Sarıev atyndaǵy kórkemsýret jáne qoldanbaly-sándik óner mýzeıinde toptamashy-etnograf, QR Eńbek sińirgen qaıratkeri Bahargúl Tólegenovanyń 3 kúndik jeke kórmesiniń ashylý saltanaty ótti.
Oblys ákimi Nurlan Noǵaev kórme lentasyn qıyp, barsha qala turǵyndary men qonaqtaryn kórmeni tamashalaýǵa shaqyrdy.
«Іske asyp jatqan sharalardyń barlyǵy uly dalany mekendegen ata-babalarymyzdyń tarıxynan syr shertip, qazirgi jahandaný, aqparattandyrý zamanyndaǵy umyt bolyp bara jatqan dástúrimizdi, ádet-ǵurpymyzdy, qural- saımandar, áshekeıler men qundy dúnıelerdi eske túsirýge baǵyttalǵan. Búgingi kórme de sonyń bir dáleli. Óz atymnan Bahargúl xanymǵa rızashylyǵymdy bildiremin. Kórmeni kórýge kelgen árbir atyraýlyq ózine kerek, qundy maǵlumattarmen tanysyp, buryn biletin aqparattar aıasyn keńeıtip, buryn-sońdy kórmegen jádigerler tarıxymen tanysýǵa múmkinshilik alatynyna senimdimin»,- dedi óńir basshysy.
Atalǵan kórme Atyraýda alǵash ret uıymdastyrylyp otyr. Osyǵan deıin Almaty jáne Astana qalalarynda birneshe ret ótkizilgen.
«Halqymyzdyń salt-dástúri men ulttyq ónerin, mádenıeti men ádebıetin tanı biletin jáne ony qurmetteıtin kıeli de qazynaly Atyraý óńirine keldik. Týyndylarymyzdy kórip, baǵalasyn degen oımen búgingi kórmeni uıymdastyryp otyrmyz. Osy sharany uıymdastyrýǵa qoldaý kórsetken oblys ákimdigine alǵysym sheksiz. «Ádemi-aı» kompanııasy 20 jylǵa jýyq ýaqyt ishinde ult qundylyǵyn saqtaý jolynda eńbek etip keledi. Búgingi maqsat - jastardyń kórme jádigerlerimen tanysyp, babalar amanatyn keıingi urpaqqa jetkizýine jaǵdaı jasaý»,- deıdi Bahargúl Tólegen.
