Atyraýda sý eseptegish quraldary shyǵarylady
Jańa zaýyt Mahambet aýdanyndaǵy Sarytoǵaı aýylynda salynady.
Sheteldik qurylǵylarmen jabdyqtalatyn zaýytta bolashaqta aıyna 18 myń danadan astam ólshegish qurylǵylaryn shyǵarylady.
«Qazirgideı kúrdeli kezeńde biz úshin jumys orny men óndiris oshaǵy mańyzdy. Sý eseptegish quraldaryn shyǵaratyn zaýyt – Mahambet aýdanynda boı túzeıtin alǵashqy óndiris orny. Ekonomıkaǵa paıdaly mundaı jobalardy kóbeıtý aldaǵy ýaqytta da jalǵasady»,-dedi oblys ákimi Mahambet Dosmuhambetov.
Jańa zaýytta 80 adam jumyspen qamtylady. Onyń 60-tan astamy – jergilikti turǵyndar. Solardyń qatarynda Sarytoǵaı aýylynyń turǵyny Azamat Sultashev ta bar.
«Buǵan deıin Teńiz kenishinde jumys istep keldim. Aýylymyzda otandyq ónim shyǵaratyn zaýyt ashylatynyn estip, osynda aýystym. Munda menimen birge aýyldastarym jumys isteıdi. Arnaıy oqý kýrsynan óttim. Erekshe zaýyttyń alǵashqy qyzmetkeriniń biri bolǵanyma qýanamyn»,-deıdi ol.
Al, «Guryev» JShS-niń dırektory Jeńis Bekbasarovtyń aıtýynsha, bul - Qazaqstandaǵy otandyq eseptegish quraldar shyǵaratyn alǵashqy ónerkásip. Qajetti shıkizattyń barlyǵy el ishinen ákelinedi. Ári ekologııalyq turǵydan qaýipsiz. Alǵashqyda zaýyt oblys kásiporyndaryn qamtamasyz etedi. Keıin respýblıkanyń ózge óńirleriniń de suranysyn qanaǵattandyrady.
«Sý ólsheýish quraldary qazirgi tańda shetelden jetkizilip jatyr. Sondaı-aq shetelden ákelingen bólshekteri qurastyrylady. Sondyqtan bul zaýyt elimiz úshin óte paıdaly óndiris bolady dep otyrmyz. Bastapqyda munda mehanıkalyq eseptegish quraldar, keıin elektrondy túrleri shyǵarylady. Munyń tıimdiligi – aı saıyn sýdy qansha tutynǵanyn qurylǵy avtomatty túrde esepteıdi. Osy oraıda, elimizde júrgizilip jatqan aqparat tasymaldaý júıelerin tsıfrlandyrý jumysyna da ıgiligi tıetin erekshe joba deýge bolady»,- dedi Jeńis Bekbasarov.
Sonymen qatar, shara barysynda zaýyt basshylyǵy eki kompanııamen memorandýmǵa qol qoıdy. Atalǵan zaýyt qurylysy osy jyldyń qyrkúıek aıynda aıaqtalyp, óndiristik jumysyn bastamaq.
