Atyraýda shaǵyn bıznesti júrgizýdiń problemalary aıtyldy
Atyraý oblystyq kásipkerler men jumys berýshiler odaǵynyń atqarýshy dırektory Rafhat Bozbalıevtyń aıtýynsha, Qazaqstanda «Vırtýaldy qoıma» modýlinde elektrondyq túrde rásimdeletin taýarlarǵa ilespe júk qujattaryn engizýdiń pılottyq jobasy bastalǵan.
«Bul shara Eýrazııalyq ekonomıkalyq odaq sheńberinde taýarlar aınalymynyń tolassyz baqylanýyn qamtamasyz etýge tıis. Mundaı jańashyldyq kóp qabatty úı janyndaǵy dúkender men shaǵyn marketter ıeleri tarapynan alańdaýshylyq týdyryp otyr. Sondyqtan, kezdesý memlekettik organdar men bıznes ókilderi arasynda ótkizýdi uıǵardyq», -deıdi Rafhat Bozbalıev.
Al, kásipkerlerdiń pikirine súıensek, bul eń aldymen, shaǵyn bıznes ıelerin kóptegen qıyndyqqa ushyratady. Sondaı-aq azyq-túlik baǵasynyń qymbattap, úı janyndaǵy dúkenderdiń jabylyp qalýy múmkin. Máselen, shaǵyn dúkenniń ıesi Lázzat Dosmaǵambetovanyń aıtýynsha, azyq-túlik satatyn núktelerde esep júrgizetin eshkim joq. Óıtkeni, satýshylarǵa saýdany táýligine 16 saǵat boıy júrgizýine týra keledi. Al, esep júrgizý úshin basqa adamdy jaldaýǵa múmkindik joq.
«Vırtýaldy qoımany», elektrondy shot-faktýralardy engizsek, biz buǵan úlgermeımiz. Klıentterge qyzmet kórsetýge áreń úlgeretindikten, olardy 15 mınýttan artyq keshiktire almaımyz. Tipti, bizdiń kópshiligimizde bul salada arnaıy bilim de joq. Al bizdiń shaǵyn bızneste 300 myń teńgege esepshi jaldaý tipten múmkin emes», -deıdi Lázzat Dosmaǵambetova.
Sondaı-aq, zańsyz alkogol ónimderin anyqtaý úshin «Wipon Pro» qosymshasy ázirlengen. Ony saýda núkteleriniń ıeleri mindetti túrde ornatýy kerek. Dúken ıeleriniń aıtýynsha, bul kóp qarjy men ýaqytty ysyrap etedi.
«Biz bul qosymsha úshin jylyna 8 myń teńge tóleýge tıispiz. Bul keıbir brendterdi anyqtaı almaıdy. Sol sebepten, sandardy qolmen engizý kerek. Sondyqtan bul baǵdarlamanyń paıdasy joq», -degen pikirimen bólisti kásipkerler.
Shaǵyn markettiń ıesi Azamat Makkeniń aıtýyna qaraǵanda, taýarlardy satýdan túsken tabystyń 15%-y kommýnaldyq qyzmetter, banktik paıyzdar, salyqtar men qyzmetkerlerdiń jalaqy shyǵyndaryn tolyq ótemeıdi.
«Biz ózimiz ornatqan konteınerden qoqysty shyǵarý úshin aıyna 60 myń teńge tóleımiz. Oǵan qosa jaryq, gaz, sý, úı-jaıdy jalǵa alý aqysyn, salyq pen qyzmetkerlerdiń jalaqysyn tóleý qajet. Bank kartasymen nemese QR-kodpen tólem úshin bank bizden 3%-ǵa deıin qarjy ustap qalady. Kartadan aqsha alý úshin taǵy 1% qarjy ustalady. Nátıjesinde aıyna 400 myń teńgeni bankterge beremiz. Endi «Vırtýaldy qoıma» modýlinde elektrondy túrde rásimdelgen taýarlarǵa ilespe júk qujattaryn engizse, bul shaǵyn bıznesti qıyndyqqa ushyratady. Nátıjesinde azyq-túlik baǵasynyń ósýine áser etedi», -dep esepteıdi Azamat Makke.
Kezdesýge qatysqan Atyraý qalalyq kásipkerlik bóliminiń, Memlekettik kirister departamentiniń ókilderi kásipkerlerdiń máselelerin sheshýge yqpal etetin usynystardy tıisti oryndarǵa jetkizýge ýáde berdi.