Atyraýda ruqsaty joq uıym medıtsınalyq qaldyqtardy joıýmen aınalysqan
Atyraý oblysynyń mamandandyrylǵan tabıǵat qorǵaý prokýratýrasy tıisti lıtsenzııasyz medıtsınalyq qaldyqtardy óńdeý jáne joıý qyzmetin kórsetý deregin anyqtady.
«Jańa Ekologııalyq kodekstiń jáne «Ruqsattar jáne habarlamalar týraly» Zańnyń talaptaryna sáıkes 2022 jylǵy 1 qańtardan bastap qorshaǵan ortany qorǵaý salasyndaǵy jumystardy oryndaýǵa jáne qyzmetter kórsetýge, onyń ishinde qaýipti qaldyqtardy qaıta óńdeýge, zalalsyzdandyrýǵa, kádege jaratýǵa jáne (nemese) joıýǵa lıtsenzııa talap etiledi. Alaıda, «Atakım» JShS memlekettik satyp alý týraly sharttarǵa sáıkes Atyraý qalasynyń medıtsınalyq mekemelerine tıisti ruqsat qujaty bolmasa da medıtsınalyq qaldyqtardy kádege jaratý qyzmetin kórsetip kelgen. Osyǵan baılanysty prokýrorlyq den qoıý sharalarymen qaladaǵy 15 emhana, 2 ońaltý ortalyǵymen 22,4 mln teńgege medıtsınalyq qaldyqtardy kádege jaratý boıynsha qyzmetterdi memlekettik satyp alý týraly jasalǵan 19 shart buzyldy. Buǵan jaýapty 14 tulǵa tártiptik jaýapkershilikke tartyldy», -dep habarlady tabıǵat qorǵaý prokýratýrasynan.
Sondaı-aq, oblystyq ekologııa departamentine QR Ákimshilik quqyqbuzýshylyq týraly kodeksiniń 463-babymen (Tıisti tirkeýsiz, ruqsatsyz nemese habarlama jibermeı kásipkerlik qyzmetpen aınalysý) kináli tulǵalardy ákimshilik jaýapkershilikke tartý baǵytynda sharalar qabyldaý,zańdylyqty buzýshylyqty joıý týraly usynys engizildi.
Eske sala ketelik, budan buryn Atyraý perzenthanalarynda qyzmetter baǵasy negizsiz ósirilgenin jazǵan edik.