Atyraýda polıtsııadan qashqan júrgizýshige 233 myń teńge aıyppul salyndy
Oblystyq polıtsııa departamenti baspasóz qyzmetiniń málimetinshe, 27 qazan-5 qarasha aralyǵynda «Shetel avtokólikteri» jedel profılaktıkalyq is-sharasy ótip jatyr.
«Atalǵan is-shara kezinde patrýldik polıtsııa qyzmetkerleri Reseı Federatsııasynda tirkeýde turǵan «Vaz-2115» markaly avtokóligin toqtatty. Alaıda, 26 jastaǵy júrgizýshi tártip saqshylarynyń talabyn oryndamaı, qashyp ketken. Keıin kólik júrgizýshisiniń Jumysker shaǵyn aýdanynda jol erejesin buzǵany anyqtaldy. Tekserý kezinde júrgizýshiniń buǵan salynǵan 11 aıyppulyn tólemegeni belgili boldy» -dep habarlady departamenttiń baspasóz qyzmeti.
Polıtsııadan qashyp, jol-kólik oqıǵasyna urynǵan júrgizýshige qatysty ákimshilik hattamalar toltyrylyp, 233 myń 330 teńge kóleminde aıyppul salyndy.
Eske sala ketelik, buǵan deıin Atyraýda urlanǵan kólik 15 mınýtta ıesine qaıtarylǵanyn habarlaǵan edik.