Atyraýda oqýshylar qashyqtan oqyp jatsa da, ata-analardan aqsha jınalǵan

ATYRAÝ. QazAqparat – Atyraýda ata-analardan aqsha jınaý faktileri azaıar emes. Bul másele «Atyraý – adaldyq alańy» jobalyq keńsesiniń bastamasymen ótken onlaın-konferentsııada talqylandy, dep habarlaıdy QazAqparat.

Onlaın-konferentsııaǵa oblystaǵy barlyq mekteptiń dırektorlary men ata-analar komıtetiniń 92 múshesi qatysqan.

«Ótken jyly 1 myńǵa jýyq ata-ana men muǵalimder arasynda anonım saýalnama júrgizdik. Sonyń nátıjesinde mektepterde aqshanyń 65% ata-analardyń bastamasymen jınalatynyn bildik. Al, 35% muǵalimderdiń usynysymen jınalady eken. Jınalǵan aqshanyń 30% - muǵalimderge syılyq alýǵa, 38% - mektepke qajetti materıalǵa, 32% - oqýshylarǵa arnalǵan túrli merekelik sharalardy ótkizýge jumsalady. Osyǵan oraı sybaılas jemqorlyqqa qarsy qyzmet 4 ret túsindirý jumysyn júrgizdi. Sonyń nátıjesinde ata-analarǵa aqshasyn qaıtaryp berdik. Tipti bıyl oqýshylar qashyqtan oqyp jatsa da, ata-analar aqsha jınaýǵa baılanysty habarlasyp jatyr», - deıdi «Atyraý – adaldyq alańy» jobalyq keńsesiniń jetekshisi Álfııa Ádıeva.

Onyń aıtýynsha, byltyr ata-analardan 32 qońyraý túsken. Al, bıyl ata-analar 14 márte habarlasqan.

Oblystyq bilim basqarmasy basshysynyń mindetin atqarýshy Aqkenje Isanbergenovanyń málim etýinshe, ata-analardyń arasynda áńgime de, narazylyq ta bar. Alaıda, sońǵy úsh jylda bilim basqarmasyna aryz túspegen.

«Mektep túlekteriniń keshin ótkizýge tyıym salyndy. Soǵan oraı muǵalimder arnaıy buıryqpen tanysqany jáne ony oryndaýǵa mindetti ekeni týraly qol qoıǵan», -deıdi Aqkenje Isanbergenova.