Atyraýda munaı-gaz salasyndaǵy «QazPolymers – 2022» tuńǵysh otandyq forýmy ótti
Forýmǵa akademııalyq ǵylym men damý ınstıtýttarynyń, salalyq bıznes-qaýymdastyqtardyń, medıtsınalyq tehnıka, oqshaýlaý jáne oraý materıaldaryn, plastıkalyq qubyrlardy shyǵarýshylar, sondaı-aq, munaı óńdeý, munaı-hımııa kompanııalarynyń ókilderi qatysty. Olar aldymen «Kazakhstan Petrochemical Industries Inc» JShS-niń zaýytyna bardy. Bul Qazaqstandaǵy tuńǵysh gaz-hımııa kesheni. Kásiporyn 2023 jyly jylyna 500 myń tonna ónim óndiredi. Bul kásiporyndy álemdik naryqtaǵy eń iri óndirýshilerdiń qataryna qosady.
Atyraý oblysynyń ákimi Serik Shápkenov zákirli jobalardy júzege asyrý ınfraqurylymdy damytýǵa, ınvestıtsııa men sońǵy tehnologııalardy tartýǵa, jańa jumys oryndaryn ashýǵa yqpal etetinine toqtaldy.
Ondaǵy áńgime elimizde kómirsýtekter negizinde joǵary tehnologııalyq ónimder shyǵara alatyn otandyq kásiporyndardy qurýdyń mańyzdylyǵy týraly boldy.
«Álemdegi barlyq taýarlardyń 96%-y munaı-hımııa ónimderinen óndiriledi. Al, jan basyna shaqqandaǵy munaı-hımııa ónimderiniń álemdik ortasha jyldyq tutynýy – 300 keli. Sizdiń úıińizdi mysalǵa alaıyq, shatyrdyń, qabyrǵalardyń jáne edenniń jylý oqshaýlaǵyshynda polıýretan, plastıkalyq panelder jáne polıetılen bar. Jıhaz óndirisinde aǵashtan basqa PVH, polıstırol jáne polıpropılen kóp qoldanylady. Al, teledıdarlar men kir jýǵysh mashınalar negizinen polıstırol, polıkarbonat jáne polıpropılennen jasalǵan. Tipti avtomobılderdiń jartysynan kóbi polımerli ónimderden turady. Bul avtokóliktiń qunyn 10 esege tómendetýge jáne otyn shyǵynyn tórtten birge tómendetýge múmkindik beredi», -dedi «Báıterek» «Ulttyq basqarý holdıngi» AQ tóraǵasy Qanat Sharlapaev.
Munaı-hımııa ónimderin óndirýdiń negizgi shıkizaty munaı jáne tabıǵı gaz bolyp tabylady. Ónimniń aýqymdy kólemi eksportqa shyǵarylady.
«Eger osy shıkizattan tyńaıtqyshtar, maılar men eritkishter óndirilse, onda qosylǵan qundy 2 ese arttyrýǵa bolady. Polımerler óndirisi qosylǵan qundy 7 esege deıin, al daıyn plastmassa buıymdaryn óndirý 15 esege deıin arttyrady. Sondyqtan biz úshin polımerli shıkizatty tutynýshy kásiporyndarǵa belsendi qoldaý kórsetý mańyzdy. «Báıterek» holdıngi otandyq munaı hımııasyn damytýdyń jalpy isine óz úlesin qosýda», -dedi Qanat Sharlapaev.
Forýmǵa qatysýshylar ónerkásiptik, azyq-túlik, turmystyq, medıtsınalyq jáne basqa da salalarǵa qajetti ónim shyǵaryp, eksporttyq múmkindikti arttyrý úshin Qazaqstannyń tıimdi ornalasý geografııasyn barynsha tıimdi paıdalaný qajettigine basa nazar aýdardy.
Forým aıasynda «Munaı-gaz hımııasy – ulttyq ekonomıkany ártaraptandyrýdyń jańa draıveri» jáne «Qazaqstandyq polıpropılen – túpkilikti ónim óndirý boıynsha otandyq bıznesti damytý perspektıvalary» taqyrybynda eki paneldik sessııa ótti.