Atyraýda múgedek balalardy jylqymen emdemek

ASTANA. QazAqparat - Kanısterapııa ortalyǵynyń jetekshisi Erlan Kúmisqalıev aımaqta jylqymen emdeý isin damytýdy kózdep otyr, - dep habarlaıdy Atyraý oblystyq óńirlik kommýnıkatsııalar qyzmeti.

Búkilhalyqtyq daýys berý qorytyndysymen Erlan Kúmisqalıev «Qazaqstannyń 100 jańa esimi» jobasyna qatysýǵa usynylǵan edi. Atyraý oblysynan jobaǵa 7 úmitker irikteldi, onyń qatarynda «Atyraý. Shaǵyn el» qoǵamdyq birlestiginiń jetekshisi de bar. Uıym qyzmeti julyn jáne bas mıy zaqymdanǵan balalardy emdeý men saýyqtyrýǵa negizdelgen.

«Atyraý. Shaǵyn el» qoǵamdyq birlestiginiń qurylǵanyna bıyl 5 jyl boldy. Osy ýaqyt aralyǵynda kanısterapııa ádisi arqyly ár túrli syrqatqa shaldyqqan 300-den astam bala em-domnan ótti. Erlan Kúmisqalıev endi jylqylardyń kómegimen ıppoterapııa arqyly balalardy emdeýge nıettenip otyr. Ippoterapııa ortalyǵy Atyraýda kásipkerler men yntaly azamattardyń qoldaýymen salynady.

«Eki jyl buryn bizdiń eki jattyqtyrýshymyz Grýzııada biliktilikterin arttyryp, ıppoterapevt-ınstrýktordyń halyqaralyq sertıfıkatyn aldy. Sodan keıin jylqymen emdeý orynyn ashýdy josparladyq. Jergilikti bılik 5 ga jer telimin berdi, endi kásipkerler men qaıyrymdy jandardyń kómegimen ıppoterapııa ortalyǵynyń qurylysy bastaldy», - deıdi Erlan Kúmisqalıev.

Ortalyq qurylysy Atyraý qalasynyń mańyndaǵy Aqjar aýylynda boı kóterdi. Qurylys keler jyldyń kókteminde aıaqtalady degen jospar bar. Erlan Kúmisqalıevtiń aıtýynsha, eriktiler men demeýshiler qurylysqa qajetti jaǵdaıdyń bárin jasap otyr.