Atyraýda monopolııaǵa qarsy zańdy buzǵan kompanııalar 2,9 mlrd teńge aıyppul tóledi
Básekelestikti qorǵaý jáne damytý agenttiginiń Atyraý oblystyq departamentiniń basshysy Aıgúl Nabıevanyń málimetinshe, byltyr taýar naryǵyndaǵy básekelestiktiń jaı-kúıine 45 taldaý júrgizilgen.
«Onyń ishinde turǵyn-úı, janar-jaǵarmaı, suıytylǵan munaı gazy, elektr energııasy, azyq-túlik dárilik zattar jáne taǵy basqa taýarlar naryǵy qamtyldy. Máselen, «Jylyoıgaz» JShS Teńiz ken ornyndaǵy kommýnaldyq-turmystyq tutynýshylarǵa taýarlyq gazdy satý kezinde sharttyq negizde tólemdi 100% aldyn ala tóleýdi talap etken. «Dına» saýda-ónerkásip korporatsııasy oryndardy jalǵa alý boıynsha balamaly kelisimderge ártúrli baǵany negizsiz qoldanǵan. Byltyr 8 ákimshilik is qozǵalyp, zań buzǵandardyń 488 mln teńgeden astam monopolııalyq tabysy tárkilenip, aıyppul salyndy», -dep habarlady Aıgúl Nabıeva.
Onyń aıtýynsha, Atyraý oblysynyń ekonomıkalyq tergeý departamentimen birge suıytylǵan munaı gazyn saqtaý parkiniń jumysy tekserilgen. Onyń qorytyndysymen 2,5 mlrd teńgeniń quqyq buzýshylyǵy anyqtalǵan.
Al, Atyraý kólik prokýratýrasymen birlesip «RTI-AMÓZ» JShS-niń qyzmetin tekserý kezinde temirjol salasynda monopolııalyq joǵary baǵalardy belgileý, ártúrli baǵalardy ne ártúrli sharttardy qoldaný túrindegi zań buzýshylyq tirkelgen. Zańsyz tabys 73 mln teńgeni quraǵan. Sondaı-aq, 411 mln teńgeden astam somaǵa salynǵan aıyppul ótelgen.
Bıyl 20-dan astam taýar naryǵynda básekelestiktiń jaı-kúıine taldaý júrgizý josparlanǵan.
«Taldaý júrgizý naqty naryqtyń damý deńgeıin baǵalaýǵa, yqtımal jáne qoldanystaǵy kedergilerdi, domınanttardyń basym jaǵdaılardy teris paıdalanýyn anyqtaýǵa múmkindik beredi. Zańnamany buzý zertteletin taýar naryǵynda ǵana emes, aralas salalarda da úlken zardapqa ákep soǵady. Sýbektiler arasyndaǵy adal básekelestiktiń damýyna jol bermeıdi. Naryqtyń odan ári monopolııalanýyna ákelýi múmkin», - dep málim etti Aıgúl Nabıeva.
Qazir monopolııaǵa qarsy zańdy buzýǵa baılanysty 5 is tergelip jatyr.
