Atyraýda mınıstrlik sheshimimen jabylǵan ınstıtýt lıtsenzııasyn qaıtaryp aldy
Atyraý ınjenerlik-gýmanıtarlyq ınstıtýty bilim berý qyzmetin júrgizý quqyǵyn sot arqyly qalpyna keltirdi. Bul týraly ınstıtýt rektory Ádilbek Turdalıev pen quryltaıshysy Ersaıyn Ihsanov málimdegen.
Endi Bilim jáne ǵylym mınıstrligi bir aıdyń ishinde oqý ornyna lıtsenzııasyn qaıtarýy kerek. Rektordyń aıtýynsha, barlyq professorlyq-oqytýshylyq quram men stýdentterge oqý protsesiniń qaıta jandanǵany týraly habarlama jiberildi.
«Atyraý oblystyq sotynyń ákimshilik ister jónindegi sot alqasy Bilim jáne ǵylym mınıstrligi Bilim sapasyn qamtamasyz etý komıtetiniń 2022 jylǵy 1 qyrkúıektegi buıryǵy men aktisin zańsyz dep tanydy. Sot úkimi 2022 jyldyń 10 qazanynda zańdy kúshine endi. Sheshim bir aı ishinde oryndalýy kerek», - delingen Atyraý oblystyq sotynyń habarlamasynda.
Eske salaıyq, 2022 jyldyń sáýirinde Bilim jáne ǵylym mınıstrligi memlekettik standart pen biliktilik talaptaryna sáıkes kelmegendikten Atyraý ınjenerlik-gýmanıtarlyq ınstıtýtynyń lıtsenzııasyn qaıtaryp alǵan bolatyn. Al bilim ordasynda 1640 stýdent oqıtyn. Instıtýt basshylyǵy mınıstrlik sheshimimen kelispeı, sotqa shaǵymdanǵan.
