Atyraýda memleket pen azamattyq sektordyń ózara is-qımyl jasaý máselesi talqylandy
Ortalyqtyń negizgi mindeti ÚEU qurý kezinde kómektesý, ádistemelik kómek kórsetý jáne usynylǵan ıdeıalardy qoldaý bolyp tabylady.
- Biz osy baǵytta óńirde qandaı aýqymdy jumystar júrgizilgenin kórip otyrmyz. Bizge iske asyrylyp jatqan jobalardy tanystyrdy. Búgingi kúni azamattyq qoǵam dep kommertsııalyq emes uıymdardyń ǵana jasaıtyn jumysyn aıtýǵa bolmaıdy. Bul turǵyndardyń barlyq múddeli sanattarynyń jumysy. Bul úshin ÚEU qurýdyń qajettiligi joq, - dep esepteıdi Darhan Qaletaev. - Respýblıka boıynsha 20 myńdaı ÚEU tirkelgen, onyń 8 myńy jumys jasamaıdy.
Atyraý oblysynda resmı tirkelgen 500 ÚEU-nyń 100-ge jýyǵy ǵana belsendi jumys jasaıdy.
- Bul jerde jumys jasamaıtyndardy ne isteý kerek degen suraq týyndaıdy. Olardyń qajeti bar ma? Biz ÚEU-nyń qaıta tirkeýden ótýin talap etemiz be, álde áreketsiz uıymdardy joıýdyń basqa joldaryn tabamyz ba. Oılastyrý qajet, -dep atap ótti Darhan Qaletaev. - Qazirgi tańda ÚEU-dyń sanyna emes, olar kórsetetin qyzmettiń sapasyna basa nazar aýdarý qajet. Jyl saıyn memlekettik tapsyrysty júzege asyrý úshin bıýdjet 19 mlrd teńgeden astam qarjy bóledi. Taǵy 5 mlrd teńgeden astam shetelden qarjylandyrylady. Áleýmettik tapsyrys qanshalyqty sapaly oryndalýda?
Atyraý oblysynyń ákimi Nurlan Noǵaev óńirde ÚEU men memlekettik mekemelerdiń arasyndaǵy ózara is-qımyl boıynsha nátıjeli jumystar jasalǵanyn aıtyp ótti. Túrli baǵyttarda iske asyrylatyn jobalar qoǵamdy alańdatatyn ózekti máselelerdi birlesip sheshýge múmkindik beredi.
- Siz óńirde qandaı jumystar júrgizilip jatqanyn kórdińiz. Biz óz tarapymyzdan Memleket basshysynyń azamattyq qoǵam ınstıtýttaryn odan ári jetildirý jónindegi tapsyrmasyn oryndaı otyryp, ózara is-qımyl jasaýdyń jańa joldaryn izdestirýdi jalǵastyratyn bolamyz, - dedi Nurlan Noǵaev.
- Turǵyndardyń, qoǵamnyń problemalyq máselelerin tereń túsiný úshin biz «Atyraý Tsıfrlyq Qabyldaý» mobıldi qosymshasy men Telegram «Atyraý oblysynyń ákimdigi» chat-arnasyn iske qostyq. Aqparattyq tehnologııalar arqyly azamattar ózderin tolǵandyratyn suraqtardy qoıyp, jedel jaýap ala alady. Bul júıe alty aıdyń ústinde jumys jasap, óziniń tıimdiligin kórsetti. Jumys jalǵasatyn bolady.
Óńirdiń ÚEU ókilderimen ótken keńeste Qazaqstannyń Azamattyq Alıansynyń prezıdenti Asylbek Qojahmetov óz pikirin bildirdi.
- Búgingi kúni azamattyq sektordyń maǵynasy keń. Bul kásipodaqtar da, dinı sektor - meshitter men shirkeýler de. Joǵary oqý oryndary, zııatkerlik baılyqtyń shoǵyrlanǵan jeri. Olar da úkimettik emes sektordyń osy qýatty qozǵalysyna tartylýy tıis. Eger Batys elderdi alyp qarasaq, mysaly Gollandııada el turǵyndarynyń 15%-y úkimettik emes sektorda jumys jasaıdy, Qazaqstanda bar bolǵany 0,3%. Bizdiń búgingi mindetimiz ÚEU men memlekettik organdardyń arasyndaǵy júıeli jumysty jolǵa qoıý. Atyraýǵa saparymyz óńirlik ÚEU ókilderiniń usynystaryn tyńdaýdyń taǵy bir múmkindigi, -dedi Asylbek Qojahmetov.
Mınıstr Qaletaevtyń aıtýynsha, Azamattyq Alıans memleket pen qoǵam ınstıtýttarynyń arasynda azamattyq dıalog alańyn uıymdastyrý boıynsha negizgi áriptesterdiń biri retinde sanalýda. Mınıstr azamattyq qoǵamdy damytý salasynda zańnamany jetildirýde jáne úkimettik emes uıymdar men memlekettiń ózara is-qımylyn damytý jónindegi Ulttyq jospardy iske asyrýda Azamattyq Alıanstyń áleýetin paıdalanýdy usyndy. Onyń pikirinshe, Azamattyq Alıans qazaqstandyq ÚEU-dyń ornyqtylyǵy men básekege qabilettiligin arttyrý, jańa bilimge oqytý máselelerimen aınalysatyn, ÚEU úshin respýblıkalyq ádistemelik ortalyq bola alady.
Sonymen qatar mınıstr Azamattyq Alıansty «Rýhanı Jańǵyrý» baǵdarlamasyn irgeriletý jónindegi Aǵartýshylyq joba men jańa áleýmettik bastamalar ázirleý protsesine qosylýǵa, sondaı-aq memleketik fýnktsııalardy básekeles ortaǵa berý jumysyna qatysýǵa shaqyrdy.
ÚEU ókilderi óz kezeginde pikirlerin bildirip, memleket pen azamattyq sektordyń ózara is-qımylyn jaqsartý jónindegi usynystaryn engizdi.
