Atyraýda mektep muǵalimi ekologııalyq taza sabyn jasady
Oblystyq bilim basqarmasy baspasóz qyzmetiniń málimetinshe, Maqat aýdanyndaǵy №76 L.Shahatov orta mektebiniń muǵalimi sabynnyń birneshe túrin jasap shyǵarǵan. Hımııalyq qospasyz jasalǵan sabyndar ekologııalyq tazalyǵymen erekshelenedi.
«Gıpoallergendi ónimdi kúndelikti turmysta hosh ıisti sabyn retinde qoldanýǵa bolady. Sabyndy jasaý kezindea tabıǵı ónimderdi paıdalanamyn. Máselen, lımon denege balǵyndyq, quramyndaǵy S dárýmeni aǵzaǵa nár beredi. Ekinshi túri – aqjelken qosylǵan sabyn. Onyń quramynda kóptegen dárýmender toptamasy bar. Aqjelkendi keptirý arqyly jasalǵan sabyndy jańa týǵan náresteden bastap, kez kelgen jastaǵy adam paıdalana alady. Al, ónimge qosylatyn efır maıy hosh ıis beredi» deıdi Maqat kentindegi №76 L.Shahatov orta mektebiniń hımııa pániniń muǵalimi Marfýǵa Aǵynova.
Jas maman bıyl atalǵan mektepke jumysqa ornalasqan. Biraq, sabyn jasaýmen aınalysqanyna bir jylǵa jýyqtaǵan.
«Hımııa – óte qyzyqty sala. Osyndaı turmysta qoldanýatyn ekologııalyq taza ónimder jasaýǵa baýlý arqyly oqýshylardy atalǵan salaǵa qyzyqtyrýǵa bolady. Sabyn jasaýdyń qyr-syryn tolyq meńgergen soń ony oqýshylaryma úıretýge daıynmyn» deıdi jas maman Marfýǵa Aǵynova.
Eske sala ketelik, budan buryn Atyraýda mektep oqýshysy aloe ósimdiginen sýsabyn men ıogýrt jasap shyǵarǵan edi.
