Atyraýda las sýdan kól jasaǵan kásiporynǵa 10 mln teńge aıyppul salyndy
Atyraý oblystyq ekologııa departamentiniń basshysy Álibek Bekmuhametovtiń málimetinshe, arnaıy ekonomıkalyq aımaqta ornalasqan kásiporyn las sýdy dalaǵa tógip, sonyń saldarynan jasandy kól túzilgen.
«Áleýmettik jelide atalǵan seriktestiktiń jer astyna kómilgen qubyrdan quramy belgisiz las sýdy jer betine ruqsatsyz tókkeni týraly beınejazbalar jarııalanǵan. Osylaısha, «Karabatan Utility Solutions» JShS tarapynan ekologııalyq zańnama talaby buzylǵan. Osyǵan baılanysty departament qyzmetkerleri jospardan tys tekseris júrgizdi. Tekserý qorytyndysymen kórsetilgen derekter rastaldy. Qazir seriktestikke qatysty zań buzýshylyq faktisi boıynsha ákimshilik is qozǵaldy. QR Ákimshilik quqyq buzýshylyq týraly týraly kodeksi 328-babynyń 1-tarmaǵymen qorshaǵan ortaǵa emıssııalardyń normatıvterin asyrǵany úshin ákimshilik jazaǵa tartylyp, 10 mln 448 myń teńge aıyppul salyndy», - dep habarlady Álibek Bekmuhametov.
Sondaı-aq, jer betine tógilgen sarqyndy sýdy soryp, ornyn tazalaý, sóıtip ekologııalyq zańnamany buzý faktilerin joıý týraly nusqama berilgen.
Eske sala ketelik, budan burynAtyraý oblysynda aýmaǵy 6 gektar kól paıda bolǵany habarlanǵan edi. Kól Atyraý qalasynan 30 shaqyrymnan astam qashyqta, Maqat aýdanyndaǵy «Ulttyq ındýstrıaldy munaı-hımııa tehnoparki» arnaıy ekonomıkalyq aımaǵynda túzildi. Alaıda, bul aýmaqta sarqyndy sý aǵyzýǵa ruqsat berilmegen. Maqat aýdanyndaǵy sharýa qojalyǵynyń ıeleri jasandy kóldegi sýdan hımııalyq eritindiniń ıisi shyǵatynyna shaǵym aıtqan.