Atyraýda elektr qýatynyń qaıta-qaıta óshýine ne sebep boldy
Atyraý oblysynyń energetıkalyq kesheni baspasóz qyzmetiniń málimetinshe, apatqa qarsy avtomatıka elektr energııasyn óshirý jolymen iske qosylady.
«Batys aımaqtyq elektr stantsııalaryndaǵy generatsııalanatyn qýattyń jetispeýshiligine jáne 220 kV Oral-Atyraý tranzıt jelisindegi qýattyń kóbeıýine baılanysty tranzıt jelilerindegi shekti rejım kezinde júktemeni óshirý arnaıy avtomatıkasy iske qosylady. Atalǵan avtomatıka bir nemese birneshe qamtý jelilerin óshirý sekildi apattyq keleńsizdikter kezinde júkteme túıininiń turaqtylyǵyn saqtaý úshin jumys isteıdi. Qazir elektr energııasy taǵy da óship qalmas úshin tıisti sharalar qolǵa alynyp jatyr», -dep habarlady energetıkalyq keshenniń baspasóz qyzmeti.
Eske sala ketelik, budan buryn Atyraýda birneshe shaǵynaýdanda jaryq sónip qalǵanyn jazǵan bolatynbyz.
Keıin elektr qýatynyń joqtyǵynan Atyraý munaı óńdeý zaýyty jumysyn toqtatqan.
Atyraýlyqtar nelikten jaryqsyz qalǵanynyń sebebi aıtyldy.
«Mańǵystaý atom energetıkalyq kombınatynyń №1 energııa blogynyń apattyq jaǵdaıda ajyratylýyna baılanysty jıiliktiń tómendeýi baıqaldy. Osyǵan baılanysty Atyraý oblysynyń elektr stantsııalary oqshaýlanǵan jumys rejımine kóshti. Bul rejım «Teńizshevroıl», NCOC kompanııalary men «Atyraý jylý-elektr ortalyǵy» AQ-da iske qosyldy. Al, Atyraý qalasynyń sol jaq jaǵalaýyndaǵy Damby aýylynan ortalyqtaǵy shaǵynaýdandar men Talǵaırań eldimekenine deıingi aralyǵy elektr jaryǵymen tolyq qamtyldy. «Atyraý jylý-elektr ortalyǵy» AQ-dan shyǵatyn 35 kV jelisi qosyldy. Endi Atyraý qalasynyń qosalqy stantsııasynan shyǵatyn fıderler qosylady», - dep málim etti energetıkalyq keshenniń baspasóz qyzmetinen.
