Atyraýda eki jarqanat páterge kirip ketken

ATYRAÝ. QazAqparat – Atyraýda eki jarqanat terezesi ashyq páterlerge ushyp kirgen. Qutqarýshylar túnde ushatyn qustardy ustap alyp, erkindikke jiberdi, dep habarlaıdy QazAqparat.

Oblystyq tótenshe jaǵdaılar departamentiniń qoǵammen baılanys tobynan málim etkendeı, bul oqıǵa keshe, 17 tamyzda tirkelgen.

Atyraý qalasynyń Q. Sátpaev kóshesinde ornalasqan kópqabatty úıdegi eki páterdiń turǵyndary qutqarýshylarǵa qońyraý shalǵan. Olar úılerine jarqanattyń ushyp kirgenin habarlaıdy.

Turǵyndarǵa kómek kórsetý úshin jedel qutqarý jasaǵynyń qutqarýshylary mekenjaıǵa barady. Qutqarýshylar eki páterden jarqanattardy ustap alyp, erkindikke jiberedi.

«Tamyz aıynda endi ǵana qanattanǵan jarqanattar jańa qonys izdeıdi eken. Sol sebepten, osy kezeńde qanatty tyshqandar abaısyzda ashyq qalǵan tereze arqyly páterge ushyp kirýi múmkin. Mundaı jaǵdaıda sabyr saqtap, qoryqpaý qajet. Jarqanatty ustaýǵa tyryspaý kerek. Eń qarapaıym tásil – bólmeniń esigin jaýyp, terezeni ashyp, biraz kútken jón», - dep keńes berdi departamenttiń qoǵammen baılanys tobynan.

Atyraý oblystyq tótenshe jaǵdaılar departamenti qutqarýshylarynyń aıtýynsha, jaz mezgilinde janýarlardy qutqarýǵa qatysty shaqyrtý sany artqan. Buǵan deıin qutqarýshylar shuńqyr men batpaqqa túsken ıtti, sıyr men jylqyny, terektiń ushar basynan jerge túse almaǵan mysyqtardy birneshe ret qutqarypty.

Eske sala ketelik, budan buryn saıajaıdaǵy úıge jylan kirip ketkenin habarlaǵan edik.