Atyraýda brakonerlerge qatysty 144 is sotqa joldandy

ATYRAÝ. QazAqparat – Atyraýda alty aıda brakonerlerge qatysty 144 is sotqa joldandy. Bul týraly Jaıyq-Kaspıı oblysaralyq balyq sharýashylyǵy ınspektsııasynyń bas mamany Temirhan Ońaıbaev málim etti, dep habarlaıdy QazAqparat.

Onyń aıtýynsha, oblysaralyq ınspektsııa qyzmetkerleri balyq qorǵaý zańnamasy talabyn saqtamaǵan 1 165 quqyq buzýshylyq faktisin anyqtaǵan. Osyǵan baılanysty 649 adamǵa qatysty ákimshilik quqyq buzýshylyq týraly hattama toltyrylǵan. Al, 505 hattamaǵa qatysty is aýmaqtyq ýákiletti organda qaralsa, 144 is ákimshilik sotqa joldanǵan.

«Bıyl 642 balyq qorǵaý zańnamasyn buzýshyǵa 14 mln 414 myń teńgeniń ákimshilik aıyppuly salyndy. Onyń ishinde memleket paıdasyna 550 quqyq buzýshydan 10 mln 913 myń teńge óndirildi. Balyq resýrstaryna keltirilgen zııan úshin 14 quqyq buzýshyǵa 592 myń teńge somasynda talap berildi. Bizdiń ınspektorlar prokýratýra, polıtsııa, shekara qyzmeti jáne kóliktik baqylaý ınspektsııasy sekildi memlekettik organdarmen balyq qorǵaý zańnamasyn buzýshylyqtardyń aldyn alý jónindegi birlesken is-áreket júrgizip, sonyń nátıjesinde keıbir kórsetkishterdi tómendetý múmkin boldy», - deıdi Temirhan Ońaıbaev.

Quqyq jáne tabıǵat qorǵaý organdarymen birlese júrgizilgen reıdtik is-shara kezinde zańsyz aınalymnan 7 tonna 378 keli balyq tárkilengen. Onyń ishinde 688 keli bekire tuqymdas baǵaly balyq túrleri bar.

Tabıǵat qorǵaý zańnamasyn buzýshylardan 543 balyq aýlaý quraly, 113 kólik pen júzý quraly alynǵan. Sondaı-aq, sý aıdyndarynan 1 814 dana ıesiz aý, qarmaq sııaqty quraldar tabylǵan.

Eske sala ketelik, budan buryn brakonerlerden 21 tonna balyq tárkilenip, 20 mln teńgege jýyq aıyppul salynǵanyn jazǵan edik.