Atyraýda birqatar eńbekkerler marapattaldy
Sanıtarııa normalaryn saqtaı otyryp uıymdastyrylǵan jıynda aımaq basshysy Mahambet Dosmuhambetov atyraýlyqtardy Táýelsizdik merekesimen quttyqtap, ataýly datanyń mańyzyna toqtaldy.
«Bul - ult armany aqıqatqa aınalǵan kún. Biz, tasqa tarıhyn jazyp irgeli memleketter qurǵan eldiń urpaǵymyz» degen oblys ákimi elimiz egemendik alǵan jyldan búginge deıingi jetistikterdi de atap ótti.
«Otyz jylǵa jýyq ýaqyt ishinde ordaly elge aınaldyq. Kezindegi Túrki Qaǵanattarynyń qaharyn, alapat Altyn ordanyń aıbynyn Aq orda saltanatymen asqaqtatty. Halyqaralyq qaýymdastyqtyń tórine shyǵyp, irgeli keńesterde tórelik aıtqan sátterimiz de kóp. Qysqa ýaqytta «Qazaqstan» degen aıbyndy eldiń esimi álemniń saıası kartasyna shegelenip, jahan jurtynyń jadyna jazyldy. Qazir saıası-ekonomıkalyq damý qarqynymyz strategııalyq maqsattarymyzǵa saı óristep keledi. Elbasy salǵan sara joldy Prezıdent Qasym-Jomart Toqaev keńeıtip, tyń serpinmen damytýda» , - dedi aımaq basshysy.
Saltanatty shara barysynda Mahambet Dosmuhambetov «Teńizmunaıqurylys» AQ prezıdentiniń keńesshisi Tasqıra Múrsalıevaǵa, eńbek ardageri Maqsym Іzbasovqa «Parasat» ordenin tabys etti.
Atyraý ınjenerlik – gýmanıtarlyq ınstıtýtynyń rektory Ersaıyn Ihsanov, eńbek ardageri Amangeldi Qulbatyrov, «Atyraýınjstroı» JShS dırektorlar keńesiniń tóraǵasy Vladımır Pak, eńbek ardageri Lıýbov Monastyrskaıa «Qurmet» ordenimen marapattaldy.
Taǵy bir top atyraýlyqqa ІІІ dárejeli «Eńbek Dańqy» ordeni, «Shapaǵat» medali, «Eren eńbegi úshin» medali,
QR Qurmet gramotasy, QR Prezıdentiniń Qurmet gramotasy tabys etildi.
Budan bólek, jıynda aımaqtyń áleýmettik-ekonomıkalyq damýyna qosqan úlesi úshin óńirdiń tórt birdeı azamatyna «Atyraý oblysynyń qurmetti azamaty» ataǵy berildi. Oǵan Nuǵman Qarabalın, Tóken Jumaǵulov, Qýanyshkereı Sameshov, Jaıdarbek Zaıdýllın laıyq dep tanyldy.
