Atyraýda bir top jasóspirim qatarlasyn aıaýsyz soqqyǵa jyqqan
Oqıǵanyń vıdeosyn áleýmettik jeli qoldanýshysy Alıkosh Romanova júktedi.
Oblystyq polıtsııa departamenti baspasóz qyzmetiniń málimetinshe, oqıǵa 11 sáýirde bolǵan.
«Atyraý qalasyndaǵy kolledj jataqhanasynyń janynda 2007 jylǵy jasóspirimge dene jaraqaty salynǵan. Osy derekke qatysty QR Qylmystyq kodeksi 293-babynyń 2-bóligine sáıkes tergeý júrgizý bastaldy. Sot-medıtsınalyq saraptama taǵaıyndaldy. Kúdikti retinde 2006 jáne 2007 jylǵy jasóspirimder ustaldy. Olar Atyraý qalasyndaǵy №2 polıtsııa bólimine jetkizildi», - dep habarlady departamenttiń baspasóz qyzmeti.
Eske sala ketelik, budan buryn Atyraýda balalar úıindegi uryp-soǵý deregine baılanysty tergeý bastalǵanyn jazǵan edik. Keıin derekti arnaıy komıssııa tekserip jatqanyn habarlandy.
«Balalardyń quqyǵyn shekteý degen másele týyndamaýy kerek. Biz bul máselege erekshe nazar aýdaryp otyrmyz. Qazir oblystyq bilim basqarmasy janynan arnaıy komıssııa quryldy. Komıssııa quramyndaǵy psıhologter ár balamen jeke áńgimelesip, tekserý júrgizip jatyr. Balalardyń psıhologııalyq jaǵdaıyna baǵa beriledi. Pedagogıkalyq quramnyń tárbıe jumysyna saraptama jasalady. Arnaıy komıssııanyń tekserý qorytyndysy týraly keıin habarlaımyz», - dep málim etti Atyraý oblysy ákiminiń orynbasary Jasulan Bısembıev.
Sondaı-aq, oblystyq bilim basqarmasy basshysynyń buıryǵymen tekserý júrgizilýine baılanysty otbasylyq úlgidegi «Shańyraq» balalar aýylynyń dırektory Gúlsara Botataeva jumysynan shettetildi.
