Atyraýda bir mekteptiń 28 túlegi memlekettik bilim grantyna ıe boldy
Atyraý oblysy ákiminiń orynbasary Jasulan Bısembıevtiń málimetinshe, bıyl 211 mekteptiń 11-synybyn 6 081 túlek bitirgen. Onyń ishinde 159 túlek «Altyn belgige» ıe bolǵan.
«Mektep túlekteriniń bári de joǵary oqý ornynda memlekettik bilim grantymen oqyǵysy keledi. Alaıda grant tek mektepte sapaly bilim alǵan túlekterge beriledi. Máselen, bıyl Atyraý qalasyndaǵy «Zııatker» mektebin 32 oqýshy bitirdi. Onyń ishinde 28 túlek memlekettik bilim grantymen joǵary oqý ornyna tústi. Stýdent atanǵandar –atalǵan mektep túlekteriniń 88 paıyzy. Bul – «Zııatker» mektebi úshin úlken abyroı ári sapaly bilimniń naqty kórsetkishi», - dep habarlady Jasulan Bısembıev.
Ulttyq testileý ortalyǵynyń dırektory Rýslan Emelbaevtyń málimetinshe, bıyl Atyraý oblysynyń mektep bitirgen túlekteri úshin 1 500 nysanaly grant bólingen.
«Bul – tek Atyraý oblysynyń túlekterine bólingen grant. Máselen, pedagogıka salasy úshin 283, jaratylystaný, matematıka jáne statıstıka baǵytyna – 49, aqparattyq-kommýnıkatsııalyq tehnologııalar mamandyǵyna – 561, ınjenerlik, óńdeý jáne qurylys ındýstrııasyna – 607 grant bólindi. Nysanaly grant konkýrsyna qatysatyn úmitkerler jalpy grant konkýrsyna da qujat tapsyra alady. Biraq nysanaly grant arqyly talapker tórt qalany jáne sol qaladaǵy barlyq joǵary oqý oryndaryn belgileýge múmkindigi bar», - degen edi Rýslan Emelbaev.
Jyl saıyn mektep túlekterine Atyraý oblysy ákiminiń granty bólinedi. Bıyl ákim grantynyń sany – 240.
Eske sala ketelik, buǵan deıin Atyraý oblysynda mektep bitiretin 167 túlek Altyn belgige úmitker bolyp otyrǵanyn jazǵan edik.
