Atyraýda «Beket ata» kitaby aǵylshyn tilinde jaryq kórdi

ATYRAÝ. QazAqparat – Atyraýda «Bolashaq» túlekteri «Beket ata» kitabyn aǵylshyn tiline aýdardy, dep habarlaıdy QazAqparat.

S.Ótebaev atyndaǵy Atyyraý munaı jáne gaz ýnıversıtetiniń rektory Gúlzada Shakýlıkovanyń aıtýynsha, bul ıdeıany atalǵan oqý ordasynda jumys isteıtin «Bolashaq» baǵdarlamasynyń túlekteri qolǵa alypty.

Birneshe shetel tilin biletin jastar Aqmeshit qorymyna barǵanda osyndaı sheshimge bekingen.

«Ǵajaıyp qasıetimen el-jurttyń jadynda jattalǵan abyzdyń biri – Beket ata. Onyń adam tańdanarlyq erekshe qasıeti men kóregendigi, sáýegeıligi men sáýletkerligi ańyzǵa bergisiz áńgimeler jelisi negizinde áli kúnge urpaqtan-urpaqqa jalǵasyp keledi. Taryqqanǵa – demeý, jabyqqanǵa jebeý bolyp, qınalǵanda arýaǵynan medet suraǵan jannyń tilegin qabyl etken Beket atanyń san qyryn keıingi urpaqqa nasıhattaý úshin kitap jazǵan edim» -deıdi Jylyoı aýdanyndaǵy Aqmeshit qorymynda uzaq jyl shyraqshy bolǵan Islam qajy Myrzabekuly.

Shyraqshynyń «Beket ata» kitaby aǵylshyn tiline aýdarylyp, jaryqqa shyqty. Shekspır tilindegi 300 bettik kitaptyń taralymy – 1000 dana.

«Maqsatymyz – ulttyq qundylyqtar men asyl muralarymyzdy urpaqtan-urpaqqa jetkizýge úles qosý. Óıtkeni, Uly dala tarıhy – halqymyzdyń máńgilik murasy. Sol sebepten, ulttyq qundylyqtarymyzdy ulyqtap qana qoımaı, babalardan jetken shejireli tarıhymyzdy ózge tilde nasıhattaýdy paryzymyz sanadyq», -deıdi Gúlzada Shakýlıkova.

Eske sala ketelik, budan buryn Atyraýda jazýshy Raqymjan Otarbaevqa arnalǵan kitap tanystyrylǵanyn jazǵan bolatynbyz.