Atyraýda aıazǵa qaramastan kóshege 700 kóshet egilgen
Osyǵan baılanysty áleýmettik jelide vıdeo jarııalanǵan. Vıdeo avtorynyń aıtýynsha, 28 qarasha kúni aýa temperatýrasy 0 gradýstan tómen bolǵan. Soǵan qaramastan Atyraý qalasyndaǵy M.Baımuhanov kóshesine aǵash kóshetteri egilgen.
Óńirlik kommýnıkatsııalar qyzmetiniń aqparatyna qaraǵanda, «Baqdáýlet», «Aıaýlym» sharýa qojalyqtary 30 qarashada oblys ortalyǵyndaǵy M.Baımuhanov jáne Mahambet kóshesinde kúzgi abattandyrý aıasynda kóshet egý jumystaryn aıaqtaǵan.
«Qarasha aıynda M.Baımuhanov, Mahambet kóshelerinde buryn tóselgen órnektas, qurylys qumy, qıyrshyq tas, beton jáne asfalt qaldyqtaryn qazyp alyndy. Sodan keıin kógaldandyrylǵan aýmaqtarǵa ósimdik topyraǵy ákelindi. Daıyndalǵan 700 shuńqyrǵa 700 túp jergilikti kóshet egildi. Merdiger kóshetterdi sýarýǵa «Bıomelıorant Antızor» jáne «Bıomelıorant Salmaq» suıyq tyńaıtqyshtary, sondaı-aq qus sańǵyryǵy qosylǵan organıkalyq tyńaıtqyshtar paıdalandy», -dep habarlady óńirlik kommýnıkatsııalar qyzmeti.
«Aıaýlym» sharýa qojalyǵy Talqaırań aýylyndaǵy tálimbaqta pıramıdalyq terektiń 350, shaǵannyń 350 túp kóshetin ósirgen. Kóshet tálimbaqtan aldyn ala topyraǵymen birge qazyp alynǵan. Sharýa qojalyǵynyń jetekshisi Nazgúl Jumekeevanyń aıtýynsha, Atyraý qalasynda 0-den -10 gradýsqa deıingi tómen temperatýrada japyraqty jáne qylqan japyraqty aǵash kóshetin egýge bolady.
«Ósimdik tamyry mundaı salqyndyqta ólmeıdi. Kerisinshe, kóktemgi sáýir-mamyr aılarynda kóshetter búr jarady. Bizdiń sharýashylyǵymyzdyń oryndaýshy retinde kepildigi bar. Biz 28-29 qarashasynda egilgen 700 kóshettiń búr jaryp ósýine tolyq jaýapty bolamyz. Kóktemde kóshetter óspeı qalsa, bizdiń sharýashylyqtyń óz qarajaty esebinen qaıtadan egiledi», -deıdi Nazgúl Jumekeeva.
Eske sala ketelik, budan buryn Atyraýda eki kásiporynǵa aýany lastaǵany úshin 6 mln teńgege jýyq aıyppul salynǵanyn jazǵan edik.