Atyraýda Abaıǵa eskertkish qoıylady

ATYRAÝ. QazAqparat – Atyraýda Abaıdyń 175 jyldyq mereıtoıyna arnalǵan saltanatty shara ótti. Oǵan óńir jurtshylyǵymen birge, Qazaqstan Jazýshylar Odaǵy basqarma tóraǵasynyń orynbasary Mereke Qulkenov, jazýshy, dramatýrg Rollan Seısenbaev, Memlekettik syılyqtyń ıegeri, aqyn Aqushtap Baqtygereeva, belgili aqyn Svetqalı Nurjanovtar qatysty.

Aqyn mereıtoıyna arnalǵan sharada «Abaı jaqqan bir sáýle óshpeý úshin» atty ádebı-mýzykalyq teatrlandyrylǵan qoıylym sahnalandy. Sahnalyq qoıylymda Uljan ananyń uly Abaıdy ómirge ákelgen kezi men ákesi Qunanbaıdyń halyqtan súıinshi suraǵany, Qunanbaıdyń ulyna Ibrahım dep esim berýi, sondaı-aq, aqyn ómiriniń jarqyn sátteri kórsetildi.

«Abaı – qazaqtyń uly tulǵasy. Abaı – dana, Abaı – dara. Sondyqtan, Abaıdyń qara sózi men árbir óleńin qazaq halqynyń qazynasy dep bilemiz. Halyqqa kerek aqyl-oılaryn óskeleń urpaqqa ósıet etip qaldyrdy. Atyraý qalasynda Abaıdyń eskertkishi ornatylatyn bolady», - dedi oblys ákimi Mahambet Dosmuhambetov.

Sondaı-aq, shara barysynda Abaı Qunanbaıulynyń «Kózimniń qarasy», «Aıttym sálem, Qalamqas», «Jelsiz túnde jaryq aı» jáne basqa da ánderi shyrqaldy.

Avtor: Joldasbek Kósherbaıuly