Atyraýda 8 jasar bala Jaıyq ózenine batqan jasóspirimderdi qutqarýǵa kómektesken

ATYRAÝ. QazAqparat – Atyraýda 2 jasóspirim Jaıyq ózenine túsip ketken. Onyń birin qutqarýǵa 8 jasar bala kómektesken, dep habarlaıdy QazAqparat tilshisi.

Oblystyq polıtsııa departamentiniń baspasóz qyzmetinen málim etkendeı, oqıǵa keshe, 3 jeltoqsanda bolǵan.

Atyraý qalasynda Jaıyq ózeniniń ústinen salynǵan birneshe kópir bar. Sonyń biri Balyqshy shaǵyn aýdany men Jumysker eldi mekenin jalǵaıdy.

Eki jasóspirim atalǵan kópirdiń tusynda Jaıyq ózenine qatqan muz ústine shyqqan. Sol kezde juqa muz oıylyp, ekeýi de sýǵa túsip ketken.

Muny baıqaǵan 8 jasar Jańbyrbaı Serikuly kómekke kelip, eki jasóspirimniń birin qolyn tartyp, sýdan shyǵarýǵa kómektesken. Sýdan shyqqan jasóspirimniń biri ekinshisin qutqaryp qalǵan. Keıin sýǵa batqan eki jasóspirimniń biri 14, ekinshisi 9 jasta ekeni anyqtalǵan.

Oqıǵa ornyna jetken polıtsııa qyzmetkerleri balalarǵa alǵashqy kómek kórsetip, ata-analaryna aman-esen tapsyrǵan.

«Balamdy ajaldan qutqarǵan Jańbyrbaı Serikulynyń áreketi men janashyrlyǵy úshin alǵysymdy aıtýdy jón kórdim. Ol qorqyp qashyp ketpeı, batyl áreket etti. Qınalǵan janǵa kómegin bergen Jańbyrbaıdyń ata-anasyna da rızashylyǵymdy bildiremin», -deıdi 9 jasar jasóspirimniń anasy.

Polıtsııa qyzmetkerleri aýa-raıynyń qubylýyna baılanysty Jaıyq ózenine shyqpaıdy eskertip otyr. Óıtkeni, ózende qatqan muzdyń qalyńdyǵy áli de juqa ekeni baıqalyp otyr.

Eske sala ketelik, budan buryn 16 jasar jasóspirim Jaıyqqa batyp bara jatqan balany qutqarǵanyn habarlaǵan bolatynbyz.