Atyraýda 8 adam halyqaralyq deńgeıdegi ıppoterapııa mamany atandy
Sarapshylar ıppoterapııanyń (atqa mingizý arqyly emdeý) keń spektrli aýrýlarǵa shaldyqqan balalardy damytý men ońaltýdyń erekshe ádisteriniń biri ekenin moıyndap otyr. Attar múmkindigi shekteýli balalarǵa, súıek-bulshyq et júıesinde aqaýy bar, sondaı-aq, psıhıkalyq derti bar balalarǵa oń áser etedi. Ippoterapııanyń balalar men úlkender úshin osyndaı oń áserin esepke alǵan munaı kompanııasy «Atyraý. Malenkaıa strana» qoǵamdyq birlestiginiń bastamasyna qoldaý bildirgen. Sóıtip Grýzııadan halyqaralyq joǵary sanatty sarapshylardy shaqyra otyryp, segiz mamannyń oqýyn qarjylandyrdy.
Dáristi ótkizgender:
- Hatýna Zaýrovna Saganelıdze - medıtsına ǵylymdarynyń doktory, professor, «Nıý Vıjen» ýnıversıtetiniń medıtsına fakýltetiniń dekany, Halyqaralyq ıppoterapııa mektebiniń prezıdenti, Grýzııa ıppoterapııa federatsııasynyń vıtse-prezıdenti. «Raıdmed» ońaltý ortalyǵynyń dırektory. Grýzııa Densaýlyq saqtaý mınıstrliginiń ońaltý jónindegi sarapshysy;
- Lana Bokýchava - medıtsına ǵylymdarynyń doktor, professor assıstenti, Tbılısı medıtsınalyq ýnıversıtetiniń «Anatomııa jáne fızıologııa» kafedrasynyń meńgerýshisi;
«Biz nege grýzın sarapshylaryn shaqyrdyq? Óıtkeni, Grýzııa - ıppoterapııany medıtsınanyń bir salasy retinde memleket deńgeıinde moıyndaǵan alǵashqy memleket. Biz ıppoterapııanyń paıdasy týraly kóp aqparatqa qanyqtyq. Bizdiń jaqsy tájirıbelik bazamyz bar. Qazirgi tańda dúnıejúzinde ıppoterapııaǵa degen suranys joǵary», - deıdi «Atyraý. Malenkaıa Strana» qoǵamdyq birlestiginiń tóraǵasy Erlan Kúmisqalıev.
Dáriske tyńdaýshylar Maqat, Qurmanǵazy aýdandarynan jáne Atyraý qalasynan kelip qatysty. Úsh aptaǵa sozylǵan oqý barysynda sarapshylar ıppoterapııadaǵy erekshe ońaltý protsedýralarynyń qupııalaryn bólisti.
